Sáýirdiń sońyna deıin Qyzylaǵash aýylynda 40-qa jýyq úı paıdalanýǵa beriledi - S. Úmbetov
áýirdiń 12-si. QazAqparat /Ernur Aqanbaı / - Sáýir aıynyń sońyna deıin Almaty oblysynyń Qyzylaǵash aýylynda salynyp jatqan 40 úıdiń qurylysy aıaqtalyp, paıdalanýǵa beriledi.
Bul týraly búgin Úkimettegi selektorlyq keńeste Almaty oblysynyń ákimi Serik Úmbetov aıtty, dep habarlaıdy QazAqparat.
Onyń sózine qaraǵanda, Qyzylaǵashtaǵy sý tasqynynyń saldarynan bolǵan zardapty joıý úshin qazirgi ýaqytta 3500-den astam adam jumys isteýde. Bul jumysqa 345 birlik tehnıka, 182 kólik quraldary tartylǵan. «Qazirgi ýaqytta 449 úı ýchaskeleriniń 444-iniń transheıasy daıyndaldy. 213 úıdiń irgetasy qalana bastady. 100 úıdiń kirpishin qalaý aıaqtaldy. Meniń oıymsha, osy aıdyń sońyna deıin 35-40 úıdiń qurylysy aıaqtalyp, paıdalanýǵa beriletin bolady», dedi ákim.
S. Úmbetovtiń aıtýynsha, qazirgi ýaqytta Qyzylaǵashta 9,7 shaqyrym sý qubyry júrgizilgen. Joǵary voltty jeliniń qurylysy aıaqtaldy. Aýyl elektr qýatymen qamtamasyz etildi. Qyzylaǵashta telefon baılanysy qalpyna keltirilgen. Sonymen qatar S. Úmbetov Qyzylaǵashta da kóktemgi egis naýqanyna daıyndyq jumystary bastalyp ketkendigin atap ótti. Bul óńirde 2000 gektar jerge dándi-daqyldar egiletin bolady. Kóktemgi egisti tuqymmen, tehnıkamen qamtamasyz etýdi, ony qarjylandyrý máselesin oblys óz kúshimen sheship otyr.
