Sáýirdiń eń sýyq kúnderi qaı kezde bolady
NUR-SULTAN. QazAqparat - Sáýir aıynyń eń sýyq kúnderi ekinshi jáne úshinshi onkúndiktiń ortasyna dóp keledi. Bul týraly OKQ-da ótken baspasóz máslıhatynda «Qazgıdromet» RMK Aýa raıyn uzaq merzimge boljaý basqarmasynyń basshysy Juldyz Isabekova málim etti, dep habarlaıdy QazAqparat tilshisi.
«Sáýir aıy áli de aýyspaly maýsymnyń ortasy bolǵandyqtan, aýa raıy qubylmaly bolmaq. Aıdyń ortasyna qaraı búkil Qazaqstan batys jáne ońtústik tsıklondardyń yqpalynda bolyp, elimizdiń ońtústik-shyǵys jáne shyǵysynda naızaǵaı oınap, ekpindi jel soǵady; burshaq jaýyp, soltústikte jańbyrdyń arty erı jaýatyn qarǵa ulasady; sondaı-aq ekpindi jel soǵyp, kóktaıǵaq bolady; túngi jáne kúndizgi saǵattarda tuman túsip, nóser jańbyr jaýady», - deıdi Juldyz Isabekova OKQ-da ótken baspasóz máslıhatynda.
Qazgıdromet ókiliniń aıtýynsha, sáýirde soltústikte aýa temperatýrasy túnde 0,-5°S-tan +2+7°S deıin, kúndiz +8+13°S-tan +12+20°S deıin bolsa, elimizdiń ońtústiginde túnde +5+13°S-tan +10+15°S deıin, kúndizgi ýaqytta +12+23°S-tan +18+26°S aralyǵynda bolady.
«Eń sýyq kúnder ekinshi jáne úshinshi onkúndiktiń ortasyna keledi: respýblıkanyń basym bóliginde temperatýra -5-10°S deıin, keı jerlerde 0 °S, kúndiz -2+6°S deıin tómendeıdi. Ońtústik jartysynda - túnde aýa raıy 0,+5°S deıin tómendep, topyraq betinde 3°S deıin qatqaq bolady. Kúndiz +7+15°S deıin tómendeıdi», - deıdi ol.
