Sáýirdiń aıaǵynda Qazaqstan Ulttar teatry «Baqyt qusy» qoıylymynyń tusaýkeserin ótkizedi

Bul týraly búgin Ortalyq kommýnıkatsııalar qyzmetindegi brıfıngte málim boldy.

«Maǵan, ulttar dostyǵy bul plakatqa suranyp turǵan nárse, sondyqtan kórkem shyǵarmadan góri plakat bolyp ketpeı me? Onsyz da gazet-jýrnaldarda aıtyp jatyrmyz ǵoı degen oılar keldi»,-dep toqtalǵan D. Isabekov, «men uzaq oılanyp júrip, «Baqyt qusy» atty pesanyń nobaıyn túsirdim. Bunda taǵdyrlardyń toǵysýy qamtylǵan. Eń áýeli bul kórkem shyǵarma bolýy kerek, sodan keıin ǵana ıdeıa. Ideıany kórkem týyndy, kórkem obrazdar, taǵdyrlar arqyly alyp shyǵady. Sonda ǵana ol nanymdy bolady jáne júzege asatyn ıdeıa dep oıladym da, osy pesany jazdym»,-dedi.

Osy oraıda Dýlat Isabekov bul úshinshi qoıylym ekenin, pesa ómirsheńdik qasıeti bar ekendigin dáleldegenin atap ótti.

«Demek, bizdiń dostyq týraly ıdeıamyz kún saıyn artyp kele jatyr. Shyǵarmada talaı problemalar men ótkir sózder qamtyldy», - dedi jazýshy.

Belgili bolǵandaı, QR Mádenıet jáne sport mınıstrligi arnaıy tapsyrys jasap, búginde bir aıdan astam ýaqyt boıy úlken ázirlik jumystary júrip jatyr. Qoıylymnyń tusaýkeseri 25 sáýir kúni keshqurym Beıbitshilik jáne kelisim saraıynda ótedi.

2015 jyly Qazaqstan Ulttar teatry áıgili jazýshy ári dramatýrg Dýlat Isabekovtyń «Baqyt qusy» pesasynyń qoıylymyna kiristi. Bul lırıkalyq dramada HH-HHІ ǵasyrlar toǵysynda memleketimizdiń búkil ult ókilderine áser etken ózekti qoǵamdyq máseleler tereń, oıly da keı ýaqytta kúlkili etip kórsetilgen. Pesa keıipkerleri - qoǵamymyzdyń belgili bir áleýmettik toby ómir súrip jatqan jáne taǵdyrynyń baǵyna qaraı ómir súrýge týra kelip jatqan jerlerin súıip, qurmetteıtin, otbasylarymen dos bolyp, qalyptasqan qıyn-qystaý kezeńde bir-birine qol sozýǵa daıyn adamdar.

Pesa avtory - Dýlat Isabekov , kórkemdik jetekshisi - Lıýbov Nı, rejısser - Nurqanat Jaqypbaı.