Sáýirdiń 23-inde QR Parlamenti Senatyndaǵy bos orynǵa Qostanaı oblysy boıynsha depýtat saılaýy ótedi

Bul týraly QR Ortalyq saılaý komıssııasynyń baspasóz qyzmetinen habarlady.

Ortalyq saılaý komıssııasynyń bekitken saılaýdy ázirlik pen ótkizý boıynsha negizgi sharalarynyń kúntizbelik josparyna sáıkes, sáýirdiń 2-si kúni kandıdattardy tirkeý aıaqtalǵan. Saılaý naýqany barysynda Muratov Asqar Aronuly ózin-ózi, al Nurǵalıev Jeńis Mırasulyn Qostanaı oblystyq máslıhaty usynǵan. Ekeýin de Qostanaı oblystyq saılaý komıssııasy sáýirdiń 1-inde tirkegen. Kandıdattardyń saılaýaldy úgit jumystary sáýirdiń 21-i kúni saǵat 24.00-ge deıin júredi.

Elimizdiń saılaý týraly zańnamasyna sáıkes, Parlament Senaty depýtattyǵyna úmitkerge saılaýaldy úgit júrgizýge, sondaı-aq kóliktik shyǵyndaryna respýblıkalyq bıýdjetten qarjy bólingen. Sonymen qatar olar saılaý qoryn qurýǵa da múmkindikteri bar.

«Sáýirdiń 2-inde QR Ortalyq saılaý komıssııasynyń otyrysynda «2010 jylǵy sáýirdiń 23-indegi shyǵyp qalǵan depýtattyń ornyna Qazaqstan Respýblıkasy Parlamenti Senatynyń Qostanaı oblysy boıynsha depýtatyn saılaýdaǵy saılaý bıýlleteni týraly» qaýly qabyldandy. Bul qaýlymen saılaý bıýlleteniniń mátini bekitilgen, sondaı-aq Qostanaı oblystyq saılaý komıssııasyna saılaý bıýlletenderin jetkizý merzimi anyqtalǵan», dep naqtylaı túsedi baspasóz qyzmeti.

Parlament Senaty depýtattaryn janama saılaý quqyǵy negizinde jasyryn daýys berý arqyly Qostanaı oblysy máslıhattarynyń depýtattary ózderiniń birlesken otyrysynda júzege asyrady. QR Parlamenti Senaty depýtattaryn saılaýshylardyń tizimi jergilikti buqaralyq aqparat quraldarynda sáýirdiń 15-inen keshiktirilmeı jarııalanady. Daýys berýdi, sanaýdy jáne onyń nátıjelerin jarııalaýdy Qostanaı oblystyq saılaý komıssııasy bir kúnniń ishinde júrgizedi. Al Ortalyq saılaý komıssııasy saılaýdyń túpkilikti qorytyndylaryn sáýirdiń 29-ynan keshiktirmeı anyqtaýy jáne mamyrdyń 2-inen keshiktirmeı BAQ-ta jarııalaýy tıis.