Sáýirdiń 12-si kúni Astanadaǵy «Aqjaıyq» jáne «Ál Arqa» turǵyn úı keshenderinde páterlerdi jalǵa berý úshin qujattardy qabyldaý bastalady
ASTANA. Sáýirdiń 7-si. QazAqparat /Gúlmıra Álıakparova/ - Ústimizdegi jylǵy sáýir aıynyń 12-si kúni Astana qalasynda qurylystary «Samuryq-Qazyna» Ulttyq ál-aýqat qory arqyly salynyp bitken «Aqjaıyq» jáne «Ál Arqa» turǵyn úı keshenderinde, páterlerdi jalǵa berý qaǵıdaty boıynsha úlestirý úshin azamattardan qujattardy qabyldaý bastalady,
dep habarlaıdy QazAqparat.
«Samuryq-Qazyna» UÁQ-nyń turǵyn úıdi jalǵa berý baǵdarlamasynyń bastalýyna oraı búgin qala ákimdiginde jýrnalısterge arnalǵan brıfıng ótti.
«Samuryq-Qazyna» UÁQ Jyljymaıtyn múlik qorynyń Basqarýshy kompanııasy «JMQ menedjment» JShS dırektory Aısultan Aqshorınniń aıtýynsha, «Aqjaıyq» turǵyn úı kesheninde satyp alý quqyǵysyz jalǵa beriletin páterlerdiń bir sharshy metri - 1000 teńgeni, jalǵa alý arqyly jekeshelendirýge jatatyn úılerdiń bir sharshy metri - 1366 teńgeni quraıtyn bolady. Mysalǵa, atalmysh nysanda jalǵa alý arqyly satyp alýǵa jatatyn jalpy aýdany 82 sharshy metrlik eki bólmeli páter úshin aı saıynǵy jaldaý aqysy 112,3 myń teńgeni quramaq. Al «Ál Arqa» TK-de aýdany 78 sharshy metr eki bólmeli páterdi jaldaý arqyly satyp alý úshin aıyna 80,7 myń teńgeden tóleý qajet. Aýdany 60 sharshy metrlik bólmege úmittengen úsh adamnan quralǵan otbasynyń bir aılyq ortasha tabysy 140 myń teńgeden kem bolmaýy tıis.
«Aqjaıyq» jáne «Ál Arqa» turǵyn úı keshenderinde páterler men kommertsııalyq orynjaılardy alý úshin ótinimderdi qabyldaý 2010 jylǵy sáýirdiń 12-sinde bastalady jáne ol týraly buqaralyq aqparat quraldary arqyly habarlanady.
Bastapqy eki nysanda jalǵa berý naryǵyna barlyǵy 236páter («Aqjaıyq» TK-de - 140 -, «Ál Arqa» TK - 96) tapsyrylady.
