Sáýirden bastap sýǵa artyq tólegen turǵyndarǵa aqshasy qaıtarylady - Almaty oblysy
TALDYQORǴAN.QazAqparat - Almaty oblysynyń turǵyndary sýdy paıdalaný úshin 400 mln. teńge artyq tólem jasaǵan. Osyǵan oraı, sáýir aıynan bastap artyq tólengen kommýnaldyq tólemder turǵyndarǵa tómendetilgen tarıf túrinde qaıtarylady, - dep habarlaıdy QazAqparat tilshisi.
Prokýrorlyq tekseris sheńberinde monopolıstermen shyǵyndardy zańsyz asyra kórsetý, onyń ishinde tarıftik smetaǵa qosymsha jumys oryndaryn engizý, múlikti qalpynda ustaý sııaqty negizdelmegen shyǵyndardy qosý faktileri anyqtaldy. Mysaly, «Talǵar Sý» MKK-da tarıftik smetaǵa negizsiz 78 mln. teńgeni artyq qosý saldarynan 37 myń azamat sýdy qoldanýǵa artyq tólem tólep otyrǵan.
«Almaty oblysynyń 220 myń sý tutynýshysyna artyq tólengen 400 mln. teńge kommýnaldyq tólemderi qaıtarylady. Osyǵan oraı, prokýratýranyń talaby boıynsha aǵymdaǵy jyldyń sáýir aıynan bastap artyq tólengen kommýnaldyq tólemder turǵyndarǵa tómendetilgen tarıf túrinde qaıtarylady jáne ol týraly túbirtekterde bólek baǵanada kórsetiledi»,- dep málimdedi Almaty oblysy Prokýratýrasynyń baspasóz qyzmeti.
Odan bólek, oblystyń 60 eldi mekeninde bekitilgen tarıftiń bolmaýy sebebinen, qyzmet kórsetýshi mekemeler sý tutyný baǵasyn óz qalaýy boıynsha belgilegen. Prokýratýranyń tapsyrmasyna sáıkes atalǵan fakti quziretti organmen tekserilýde.
