Sáýirden bastap elektr energııasy salasynda halyqtyń jaǵdaıy tómen tobyna arnalǵan saralanǵan tarıftiń úshinshi deńgeıi engizildi - TMRA
ASTANA. 16 sáýir. QazAqparat - Aǵymdaǵy jyldyń 1 sáýirinen bastap elektr energııasyn azǵantaı tutynatyn halyqtyń álsiz tobyna arnalǵan saralanǵan tarıftiń úshinshi deńgeıi engizildi.
Bul týraly búgin QR Parlamenti Májilisinde ótken Úkimet saǵatynda Tabıǵı monopolııalardy retteý agenttiginiń tóraǵasy Murat Ospanov málim etti.
«Halyqaralyq tájirıbeni, sondaı-aq 2 deńgeıli saralaýdy qoldaný tıimdiligin zerdeleı kele, aǵymdaǵy jylǵy 1 sáýirden bastap elektr energııasyna tutyný shamasy boıynsha tarıftik saralaýdyń úshinshi deńgeıi engizildi. Bul - elektr energııasyn shamaly tutynatyn halyqtyń álsiz tobynan aýyrtpalyqty alyp tastaý úshin jasalyp otyr», - deıdi agenttik basshysy. Onyń aıtýynsha, osyǵan oraı qazirgi tutyný shamasyna qosymsha taǵy bir deńgeıdi belgileý kózdeledi. «Mysaly munda tarıfter boıynsha aıyna bir adamǵa 150-170 kVt/saǵ. belgilenedi. Bundaı tarıfti engizýdiń nátıjesinde tutynýshylar elektr energııasyn únemdemeıtin bolady jáne energııany joǵary dárejede qoldanatyndar (olardyń úlesi 10-15 paıyz) belgilengen kólemnen asyra paıdalanǵany úshin asa joǵary tarıfpen aqy tóleıtin bolady», - deıdi M. Ospanov.
