Sáýirde shegirtke zııankesterine qarsy jumystar júrgiziledi - AShM
NUR-SULTAN. QazAqparat - Sáýirde shegirtke zııankesterine qarsy hımııalyq óńdeý júrgiziledi. Bul týraly búgin Úkimet otyrysynda Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.
«Fıtosanıtarııa salasyndaǵy is-sharalardy qarjylandyrýǵa 34,6 mlrd teńge kózdelgen. Bul ótken jylǵy deńgeıden 7,2 mlrd teńgege artyq. 2019 jyly asa qaýipti zııandy organızmder men karantındik obektilerge qarsy is-sharalar júrgizýge ótken jyly 3,6 mlrd teńge, bıyl 4,9 mlrd teńgege jýyq qarjy bólindi. Pestıtsıdter, olardy saqtaý, tasymaldaý jáne qoldaný jónindegi kórsetiletin qyzmetter satyp alynyp qoıdy. Sáýir aıynyń ekinshi onkúndiginde ońtústik óńirlerde shegirtke zııankesterine qarsy hımııalyq óńdeý júrgizý josparlanýda», - dedi veterınarlyq jáne fıtosanıtarlyq qaýipsizdik máseleleri týraly baıandaǵan mınıstr.
Onyń dereginshe, elimizdiń fıtosanıtarııalyq qyzmeti 2018 jyly asa qaýipti zııandy organızmder men karantındik obektiler (kartalar) boıynsha el aýmaǵyn óńirlendirý jumysyn júrgizdi.
«Der kezinde qabyldanǵan sharalar shegirtkelerdiń taralý aımaǵyn ótken jylǵy 1,9 mln gektardan aǵymdaǵy jyly boljanyp otyrǵan 950,4 myń gektarǵa deıin eki esege azaıtýǵa múmkindik berdi. FAO-nyń ǵylymı usynymdaryn eskere otyryp, óńdeýdiń jańa ádisteri qoldanylady. Jalpy, asa qaýipti organızmdermen zalaldanǵan alań 2016 jylǵy 5,1 mln gektardan 2019 jyly 3,9 mln gektarǵa deıin tómendedi. Karantındik aramshóp sanalatyn tikenekti alqanyń taralý oshaqtary tolyǵymen joıyldy. Amerıkalyq aq kóbelek, Komstok symyry, kalıfornııalyq qalqanshaly symyr jáne shyǵys jemis jemiri sııaqty birqatar karantındik obektilerdiń taralý alańy qysqardy», - dedi S.Omarov.
