Sáýirde OSK músheleri óńirlerde semınar-keńester ótkizedi
Bul týraly búgin QR Ortalyq saılaý komıssııasynyń tóraǵasy Qýandyq Turǵanqulov «Qazaqstan Respýblıkasyndaǵy saılaýdy baqylaý jónindegi respýblıkalyq qoǵamdyq komıssııa» respýblıkalyq qoǵamdyq birlestiginiń múshelerimen kezdesý barysynda málim etti. Kezdesý barysynda OSK tóraǵasy qazirgi ýaqytta halyq arasynda zańnamaǵa sáıkes saılaý protsesiniń erejeleri men tártibin túsindirý jumystary qolǵa alynǵanyn atap ótti. «Sáýir aıynyń basynda Ortalyq saılaý komıssııasynyń músheleri óńirlerdi aralap, birqatar semınar-keńester ótkizetin bolady», - dedi ol. Sonymen qatar ol Ortalyq saılaý komıssııasynyń barlyq qoǵamdyq uıymdarmen yntymaqtasa jumys isteýge daıyn ekendigin basa aıtty. «Biz úshin SBRQK sarapshylarynyń saılaý zańnamasyn buzýshylyqtardy qorytyndy esepke jınamaı, bizdi zań buzýshylyqtar týraly tikeleı saılaý naýqany barysynda jedel túrde aqparattandyrýy mańyzdy, bul saılaý organdaryna buzýshylyqtardy tıimdi jáne ýaqtyly joıýǵa jáne osyndaı buzýshylyqtardyń aldyn alýǵa múmkindik beredi», - dep atap ótti Q.Turǵanqulov. Kezdesý sońynda OSK basshysy saılaý organdary transparentti jáne ashyq saılaý ótkizý úshin bar kúshterin salatynyn aıtty.
