Sáýirde qazaqstandyqtarǵa qandaı vaktsınalar qoljetimdi bolady
NUR-SULTAN. QazAqparat – Qazaqstanda koronavırýsqa qarsy «Spýtnık V» vaktsınasynyń birinshi komponentin 435 myń adam aldy. Bul týraly QR Densaýlyq saqtaý birinshi vıtse-mınıstri Marat Shoranov aıtty, dep habarlaıdy QazAqparat tilshisi.
«Koronavırýstyq ınfektsııaǵa qarsy vaktsınatsııa jalǵasýda. Birinshi sáýirden bastap vaktsınatsııalaýǵa jatatyn adamdardyń sanattary keńeıtildi. Kestelerdi jergilikti atqarýshy organdar jasaıdy. Búgingi tańda birinshi komponentpen 435 myń azamat, ekinshi komponentpen – 107 myńnan astam qazaqstandyq egildi», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń dereginshe, sáýir aıynyń basynan bastap óńirlerge «Spýtnık V» vaktsınasynyń 923 myńnan astam dozasy jetkizildi.
«Osy aıynyń sońyna deıin 910 myń doza, basqa óndirýshilerdiń 500 myń dozasy jáne 25 myń «QazVac« vaktsınasyn jetkizý kútilýde. Bul eldiń shamamen 2 mln azamatyna vaktsınatsııalaýdyń qoljetimdiligin qamtamasyz etedi»,- dedi Marat Shoranov.
