Sáýirde iskerlik belsendiliktiń qalpyna kelýi baıqaldy
«Іskerlik belsendiliktiń ósýi tek óndiris salasynda baıqaldy: ındeks 50,5-ke deıin kóterildi (naýryzda – 50,0), qalǵan sektorlarda 50-den tómen mánge ıe boldy», - deıdi Rústem Orazalın.
Qyzmet kórsetý sektory men taý-ken ónerkásibinde iskerlik belsendilik qalpyna kele bastady (sáıkesinshe, 49,6 jáne 49,9), al qurylys salasynda ındekstiń tómendeýi 4 aı boıyna jalǵasyp keledi (44,5).
«Barlyq salada da jetkizý merzimi uzardy, al qurylys kásiporyndary jańa tapsyrystar kólemi men jumyspen qamtý deńgeıiniń aıtarlyqtaı tómendegenin alǵa tartty», - deıdi maman.
Óndiriste jáne taý-ken ónerkásibinde taýarly-materıaldyq qor kólemi ulǵaıǵan. 2022 jyldyń sáýirinde alǵash ret taý-ken ónerkásibi jeke bólinip qaralyp, osyǵan baılanysty derekter qatary qaıta esepteldi.
Aımaqtar bólinisi boıynsha qarastyrǵanda, ІBI-diń eń tómen máni Almaty men Aqmola oblystarynda (sáıkesinshe, 42,9 jáne 43,1), al eń joǵary máni – Mańǵystaý men Soltústik Qazaqstan oblystarynda (sáıkesinshe, 56,4 jáne 55,6) tirkeldi.
«Kásiporyndardyń aldaǵy 6 aıǵa bolashaq bıznes-jaǵdaılarǵa qatysty senimdiligi aıtarlyqtaı jaqsardy. Bolashaq jaǵdaılardy baǵalaý - 7,3 (naýryzda – (-)12,1). Nátıjesinde aǵymdaǵy jáne bolashaq bıznes-jaǵdaılardyń ortasha baǵalaýyn bildiretin bıznes-klımat ındeksi 1,8-ge (naýryzda – (-)10,3) teńesip, aıtarlyqtaı jaqsardy», - dep tolyqtyrady Rústem Orazalın.
Sáýirde júrgizilgen saýalnamaǵa 465 kásiporyn qatysty: taý-ken óndirý ónerkásibinde – 42, óndiriste – 136, qurylysta – 72, qyzmet kórsetý salasy boıynsha – 215.
Eske sala keteıik, álemdegi geosaıası ahýaldyń kúrt ózgerýine baılanysty naýryz aıynda ekonomıka qysymǵa ushyraǵan edi.
Buǵan deıin Ulttyq banktiń teńge baǵamyn turaqtandyrý sharalaryn júrgizip jatqany habarlanǵan edi.