Sáýirde Ázerbaıjan arqyly 125 myń tonna munaı tasymaldanady – Jumanǵarın
ASTANA. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın sáýirde Ázerbaıjan arqyly munaı eksporttaý josparymen bólisti, dep habarlaıdy QazAqparat tilshisi.
«Ótken jyly «QazMunaıgaz» ben «Sakar» arasynda aqyr sońynda kelisimge qol qoıyldy. 2023 jyly «Baký – Tbılısı – Djeıhan» munaı qubyry arqyly 1,5 mln tonna munaı jetkizýdi josparlap otyrmyz. Naýryzda bul protsess bastalyp, alǵashqy eki tankerdi jónelttik. Ol 20 myń tonnany quraıdy. Sáýirde 125 myń tonna jóneltpekpiz», - dedi mınıstr Úkimet otyrysynan keıin BAQ ókilderiniń saýalyna oraı.
Onyń atap ótýinshe, Baký ózge de baǵyttardy usynyp otyr.
«Máselen – «Baký – Sýpsa». Biraq, qazir biz munaı qubyrynyń tehnıkalyq sıpattamasyna esep júrgizip jatyrmyz. Munaıdyń úlken kólemi temir jol arqyly Batýmı men Potı porttaryna deıin jóneltilip jatyr. Búginde biz zerdelep jatqan basty másele – bul qazaqstandyq jáne ázerbaıjandyq taraptaǵy tasymaldaý barysyndaǵy ensiz jerlerdi joıý boıynsha jol kartasy», - dedi Serik Jumanǵarın.
Mınıstrdiń aıtýynsha, keshe atalǵan tranzıttik baǵytta arzanǵa tasymaldaý múmkindigi, naqty tarıfi bar, ınnovatsııalyq tehnologııalardy qoldanatyn biryńǵaı operator qyzmetin atqaratyn birlesken kásiporyn qurý máselesi barynsha senimmen talqyǵa tústi.
