Sáýir aıynyń basynan almatylyq jaıaý sherý bastaý alady
ALMATY. Naýryzdyń 10-y. QazAqparat /Názıra Eleýhan/ - Almatyda sáýir aıynyń 3-i men 4-i aralyǵynda sporttyq týrızmdi dáripteýge jáne TMD elderi arasynda týrıstik ujymdar dostastyǵyn nyǵaıtý maqsatyna baǵyttalǵan jaıaý sherý (marsh-brasok) jarysy ótedi,
dep habarlaıdy QazAqparat.
Almaty qalalyq týrıstik klýbynyń uıymdastyrýymen ótetin jaıaý sherýde qatysýshylar eki kún boıy kúni-túni uzaq shaqyrymdy jer júredi. Sondyqtan uıymdastyrýshylar jergilikti jerdi baǵdarlap bilgeni jón deıdi. Starttan márege deıin 70 shaqyrymdy quraıdy. Olarǵa arnaıy karta beriletin bolady.
Jaıaý sherýdiń birinshi kezeńi 2009 jyly kóktemde ótken bolatyn. Jarys Almaty qalasynyń shyǵysyna qaraı ornalasqan 150 shaqyrymdyq jerdegi Boǵýty aýylynyń aımaǵynda ótti. Oǵan 48 adam qatysyp, márege barlyǵy jetti. Al 2009 jyldyń kúzinde Alataý shatqalynda kúzgi jaıaý sherý etapy ótti. Oǵan óz elimizben qatar Reseı, Qyrǵyzstan elderinen qatysýshylar qatysqan bolatyn.
"Almatylyq jaıaý sherý bıyl úshinshi ret ótedi. Bul ázirge óte jas shara, degenmen oǵan degen qyzyǵýshylyq artyp keledi. Jarysqa qatysýshylardyń sany jyldan-jylǵa kóbeıip, bul shara dástúrge aınalady degen úmittemin", deıdi aktsııany uıymdastyrýshylardyń biri, Almaty qalalyq týrıstik klýbynyń múshesi Sonıa Rjanıtsyna.
Jarysqa kez-kelgen quramdaǵy komandalar qatysa alady. Qatysýshylar sany shekteýsiz.
