Sáýir aıynda Shymkentte koronavırýs juqtyrý 4,5 ese artqan
ShYMKENT. QazAqparat – Sáýir aıynda Shymkent qalasynda koronavırýsqa shaldyqqandar sany 4,5 ese ósti. Bul týraly qalalyq Sanıtarlyq-epıdemıologııalyq baqylaý departamentiniń basshysy Ábdimanap Tólebaev málim etti, dep habarlaıdy QazAqparat tilshisi.
Departament basshysynyń aıtýynsha, qalada COVID-19 juqtyrý jaǵdaılary azaıa bastaǵan.
«Shymkent qalasynda sáýir aıynyń 25 kúninde 2131 jaǵdaı tirkelip, aýyrǵandardyń sany 4,5 esege ósti. Naýryz aıynda esepti kezeńde 473 jaǵdaı tirkelgen edi. Epıdemıologııalyq zerdeleý barysynda naýqastanǵandardyń 29,3 paıyzy aýyrǵan adammen qarym-qatynastaǵy bolǵany anyqtaldy. Qalǵandary karantındik saqtyq sharalaryn ustanbaǵandyqtan indetke shaldyqqan. Jyl basynan beri anyqtalǵan 3475 naýqastyń 32,4 paıyzy úlken saýda úılerge, dúkenderge, 20,1 paıyzy bazarlarǵa, 18,2 paıyzy qoǵamdyq kólikterde jáne túrli jıyndarǵa barǵanda juqtyrǵan», – dedi departament basshysy.
Sondaı-aq, vedomstvo basshysy turaqty negizde sanıtarlyq-aǵartý jumystary júrgizilip jatqanyn atap ótti. Jyl basynan beri qalada osyndaı 451 shara atqarylyp, 12338 nysan túsindirý jumystarymen qamtylǵan.
