Sáýir aıynda Qazaqstandaǵy ınflıatsııa 0,1 paıyzdy qurady
ASTANA. QazAqparat - 2015 jylǵy sáýirde Qazaqstan Respýblıkasynda ınflıatsııa 0,1 paıyzdy qurady. Atap aıtqanda, baǵa azyq-túlik taýarlaryna ótken aıda 0,3 paıyz, azyq-túlik emes taýarlaryna - 0,2 paıyzǵa ósti, al aqyly qyzmetterge - 0,1 paıyzǵa tómendedi.Bul týraly Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Málimetterge qaraǵanda, ótken aıda baǵanyń jańa jınalǵan kókónisterge 7 paıyz, júzimge - 5,5 paıyz, záıtún maıyna - 3,6 paıyz, keptirilgen jemister men jańǵaqtarǵa - 1,7 paıyz, alkogoldi ishimdikterge - 1,6 paıyz, balalardyń taǵamdaryna - 1,2 paıyzǵa ósýi belgilendi. Budan bólek, jeńsik emes taǵam men balyq konservilerine baǵa 0,8 paıyzǵa, kondıter ónimderine - 0,6 paıyzǵa, toqash jáne unnan daıyndalatyn ónimderge, shujyqtarǵa - 0,5 paıyz, joǵary sortty bıdaı unynan pisirilgen nanǵa, súzbege - 0,4 paıyzdan qymbattaǵan.
Sonymen bir mezgilde, baǵanyń tómendeýi jumyrtqaǵa 2,4 paıyzdy, qantqa - 2 paıyz, qus etine - 1,6 paıyz, ósimdik-sary maıyna - 1,3 paıyz, kúnbaǵys maıyna - 1,2 pıayz, kúrishke - 1,1 paıyz, jarmalarǵa - 0,9 paıyz, shıki sútke - 0,7 paıyzǵa tirkeldi. Sondaı-aq, baǵa ósimi gazetter jáne merzimdik basylymdarǵa 1 paıyz, jıhaz jáne úıge qajetti zattarǵa - 0,9 paıyzǵa, kıim jáne aıaqkıimge, jýǵysh jáne tazalaǵysh quraldarǵa, farmatsevtıkalyq ónimderge, jeke paıdalanýǵa arnalǵan taýarlarǵa - 0,6 paıyzdy quraǵan. Al benzın baǵasy 0,4 paıyzǵa, dızel otyny - 1,2 paıyzǵa, ballondaǵy suıytylǵan gaz - 9 paıyzǵa tómendegen.
«Baǵa deńgeıi densaýlyq saqtaý qyzmetterine 1 paıyzǵa, shashtarazdar men jeke qyzmet kórsetý oryndaryna, qonaq úılerge - 0,5 paıyzdan, oıyn-saýyq jáne mádenıet salasynda - 0,4 paıyzǵa ósti. Alys qashyqtyqqa qatynaıtyn jolaýshylardyń temir jol kóligine jol júrý aqysy 0,7 paıyz, ishki qalalyq qatynastardaǵy avtobýsqa - 2,2 paıyz, áýe kóligine - 2,7 paıyzǵa arzandady. Turǵyn úı-kommýnaldyq qyzmetter salasynda tarıfter taratý jelileri boıynsha tasymaldanatyn gazǵa 1,9 paıyzǵa, elektr energııasyna - 0,4 paıyzǵa tómendep, úıdi kútip ustaýǵa - 0,3 paıyzǵa joǵarylady», - delingen baspasóz baıanynda.
