Sáýir aıynda elimizdegi kúnkóristiń eń tómengi deńgeıiniń shamasy 17 179 teńgeni qurady
ASTANA. 2 sáýir. QazAqparat - 2013 jylǵy sáýirde elimizde kúnkóristiń eń tómengi deńgeıiniń shamasy 17 179 teńgeni qurady. Bul týraly Statıstıka agenttiginiń baspasóz qyzmetinen habarlandy.
Agenttik málimetterine qaraǵanda, aǵymdaǵy jylǵy sáýirde negizgi tamaq ónimderin tutynýdyń eń tómengi normalarynan eseptelgen orta eseppen halyqtyń jan basyna shaqqandaǵy kúnkóristiń eń tómengi deńgeıiniń shamasy ótken aımen salystyrǵanda 0,2 paıyzǵa, al 2012 jylǵy sáýirmen salystyrǵanda 6,8 paıyzǵa ósken.
«Bunyń qurylymynda et pen balyqty satyp alýǵa jumsalǵan shyǵystardyń úlesi 23,5 paıyzdy, sút, maı jáne toń maı ónimderi men jumyrtqany - 16,3 paıyzdy, jemister men kókónisterdi - 10,4 paıyzdy, nan jáne jarma ónimderin - 7,7 paıyzdy, qant, shaı jáne dámdeýishterdi - 2,1 paıyzdy qurady», delingen baspasóz habarlamasynda.
