Sáýir aıynda aýa raıy qandaı bolady
NUR-SULTAN. QazAqparat - Sınoptıkter sáýir aıyna arnalǵan aýa raıynyń boljamyn jarııalady, dep habarlaıdy QazAqparat Qazgıdrometke silteme jasap.
Sáýir aıynda elimizdiń soltústik bóligindegi klımattyq norma sheginde, al ońtústik bóliginde normadan 1°S joǵary kútiledi.
«Sáýir aıynyń birinshi jáne ekinshi onkúndiginde Skandınavııa aımaǵynan soltústik-batys jáne Reseıdiń Eýropalyq aýmaǵynyń ońtústiginen batys aǵyndarynyń kelýi jıileıdi. Sonyń saldarynan 2 ret aýa raıy kúr sýytady», - delingen habarlamada.
Birinshi onkúndiktiń ortasynda jáne ekinshi onkúndiktiń birinshi jartysynda kún sýytady. Elimizdiń soltústik jáne soltústik-batysynda túnde 3...8 gradýsqa deıin tómendeıdi, keı jerlerde 11 gradýs aıaz, kúndiz 0...5 gradýs, keı jerlerde 8 gradýs jyly bolýy kútiledi, elimizdiń ońtústik jartysynda túnde 0...5 gradýs jyly, keı jerlerde 0 gradýs, kúndiz 10...15 gradýsqa deıin, keı jerlerde 20 gradýs jyly bolýy yqtımal, batysta birinshi jáne ekinshi onkúndiktiń basynda sýytady, túnde 0...5 gradýs aıaz bolady, kúndiz 5...10 gradýsqa deıin jyly bolýy múmkin.
Elimizdiń ortalyǵy jáne shyǵysynda birinshi onkúndiktiń sońynda jáne ekinshi onkúndiktiń ortasynda sýyq aǵyn kelip jetedi. Aýa temperatýrasy túnde mınýs 3...8 gradýsqa deıin tómendeıdi, keı jerlerde 11 gradýs sýyq, kúndiz 5...10 gradýs shamasynda jyly bolady.
Kún kúrt sýytqannan keıin qaıtadan jylıdy. Jeke kúnderi birinshi jáne úshinshi onkúndiktiń basynda aýa temperatýrasy soltústikte, ortalyqta jáne shyǵysta 8...13 gradýsqa deıin kóteriletin bolady, keı jerlerde 18 gradýs jyly, elimizdiń ońtústik-batys jáne ońtústik bóliginde 20...25 gradýsqa deıin, keı jerlerde 15 gradýs jyly, úshinshi onkúndiktiń basynda keı jerlerde 30 gradýsqa deıin ystyq bolady..
Sáýirde respýblıkanyń basym bóliginde jaýyn-shashyn mólsheri normaǵa jýyq, respýblıkamyzdyń ońtústik-batys bóliginde jáne ortalyqtyń keı jerlerinde normadan az, elimizdiń shyǵysynda jáne ońtústik-shyǵysynda keı jerlerde normadan joǵary túsedi dep boljanady.
