Sáýir aıynda «Astana Opera» teatrynda ótetin kontsertter tizimi jarııalandy

12 sáýirde saǵat 19.00-de «Astana Opera» Kameralyq zalynda «Shopen! Tula boıy tunǵan syr...» fortepıanoǵa arnalǵan mýzyka keshi ótedi. Belgili qazaqstandyq pıanıst Qazaqstannyń eńbek sińirgen qaıratkeri, professor Nurlan Izmaılov polıak romantık-kompozıtory Frederık Shopenniń jaýhar týyndylaryn oryndaıdy. F.Shopenniń jıyrma tórt prelıýdııasy, Barkarola fa-dıez major, Fortepıanoǵa arnalǵan sonata №3 sı mınor shyrqalady.

14 sáýirde saǵat 18.00-de «Romantızm saltanaty» kontserti usynylady. «Astana Opera» sımfonııalyq orkestriniń kontsertmeısteri Qazaqstannyń eńbek sińirgen qaıratkeri Baǵdat Ábilhanov (skrıpka), sondaı-aq Taıyr Qarataev (vıolonchel), Erlan Serkebaev (fortepıano) kameralyq ansambldik oryndaýshylyqtyń názik qyrlarynan syr shertedi. Mýzykanttar tyńdarman nazaryna Felıks Mendelson-Bartoldıdiń Vıolenchel men fortepıanoǵa arnalǵan kontserttik varııatsııasy re major jáne Sergeı Rahmanınovtyń Fortepıano, skrıpka men vıolenchelge arnalǵan «Uly sýretshi rýhyna arnalady» №2 elegııalyq trıo re mınor shyǵarmasyn usynady. S.Rahmanınovtyń aǵa tálimgeri ári avtordyń dosy P.Chaıkovskııge arnaǵan áıgili shyǵarmasy oı tereńdigin, faktýrasynyń aıtarlyqtaı aýqymdylyǵyn, sonymen qatar kúrdeli dramatýrgııalyq túpki oıdy sıpattaıdy.

17 sáýirde saǵat 19.00-de «Qazaqkvartet shaqyrady» toptamasynan «Motsarttan búgingi kúnge deıin» kontserti ótedi. Ǵazıza Jubanova atyndaǵy Memlekettik ishekti aspaptar kvarteti quramynda Aıdar Toqtalıev (1-shi skrıpka), Alekseı Lebedev (2-shi skrıpka), Bekzat Saılaýbaıuly (alt) jáne kórkemdik jetekshisi - Qazaqstannyń eńbek sińirgen qaıratkeri Ernar Myńtaev (vıolonchel) óner kórsetedi. Ujymnyń jańa kontserttik baǵdarlamasy avstrııalyq klassık V.A.Motsarttyń Іshekti aspaptar kvarteti №19 do major, Dj.Pýchchınıdiń Іshekti aspaptar kvartetine arnalǵan «Hrızantemalar» mınıatıýrasy jáne qazirgi zamanǵy qazaqstandyq kompozıtor Qýat Shildebaevtyń Іshekti aspaptar kvartetinen quralǵan. Bir kontsert aıasynda ujym klassıtsızmnen bastap búgingi kúnge deıingi túrli stılder men dáýirlerdegi mýzykany ınterpretatsııalaý ónerin pash etpek.

21 sáýirde saǵat 18.00-de elorda turǵyndary men qonaqtaryna «Venetsııalyq regata» kontserti usynylatyn bolady. Kameralyq zalda «Qazaqstannyń 100 jańa esimi» ulttyq jobasynyń jeńimpazdary atanǵan jas qazaqstandyq mýzykanttar - Batyrjan Smaqov (kontrtenor) pen Saıda Qalyqova (fortepıano) óner kórsetedi. Olarmen birge sahna tórine «Astana Opera» teatrynyń solısi Tatıana Vıtsınskaıa (metstso-soprano), Vena fılarmonııasynyń solısi Aıgúl Shamshıdenova (soprano), Qazaqstannyń eńbek sińirgen ártisi Maqpal Bekmaǵambetova men halyqaralyq baıqaýlardyń laýreattary - Mádına Kapeý (skrıpka), Asqar Muqanov (vıolonchel), Jibek Saparǵalıeva (fleıta), Raýshan Beskempirova (fortepıano) shyǵady. Kontsert baǵdarlamasynda HVI-HIH ǵasyrdaǵy Dj.Valentını, T.Vıtalı, A.Vıvaldı, G.F.Gendel, N.Porpora, K.V.Glıýk, L.Bokkerını, F.Paer, O.Respıgı syndy kompozıtorlardyń shyǵarmalary, sondaı-aq Dj.Rossınıdiń «Venetsııalyq regata» vokaldyq toptamasy oryndalatyn bolady. Kontsert Jastar jyly aıasynda ótedi.

25 sáýir kúni saǵat 19.00-de nemis romantık-kompozıtory Felıks Mendelson-Bartoldıdiń 210 jyldyǵyna arnalǵan «Sózsiz ánder» mýzykalyq keshi ótedi. QR «FORTE-TRIO» memlekettik trıosy tyńdarmandardy óz ónerlerimen qýantady, ujym quramynda Dınara Bazarbaeva-Sahaman (skrıpka), Murat Narbekov (vıolonchel), kórkemdik jetekshisi - Qazaqstannyń eńbek sińirgen qaıratkeri Tımýr Ýrmancheev (fortepıano) bar. «FORTE-TRIO shaqyrady» toptamasyndaǵy mýzykalyq keshke ujym qonaǵy - «Astana Opera» orkestriniń ártisi Almaz Toqpanov (klarnet) qatysady. «Sózsiz ánder» fortepıanoǵa arnalǵan toptamadan pesalar, F.Mendelson-Bartoldıdiń Fortepıanoǵa arnalǵan №1 trıo, re mınor, op.49, Valter Rabldiń Klarnet, skrıpka, vıolonchel jáne fortepıanoǵa arnalǵan kvartet mı-bemol major shyrqalady.

28 sáýirde saǵat 18.00-de opera solısteri men orkestr ártisteri tyńdarmandarǵa tamasha «Kóktem valsi» kontsertin usynady. Ulttyq kompozıtorlyq mektep bastaýynda turǵan kórnekti qazaqstandyq avtorlardyń shyǵarmalary oryndalatyn bolady. Baǵdarlamada L.Hamıdı, M.Tólebaev, E.Brýsılovskıı, Ǵ.Jubanova, S.Muhamedjanov, Q.Mýsın, N.Tilendıev, Sh.Qaldaıaqov, E.Rahmadıev, N.Meńdiǵalıev jáne t.b. sazgerlerdiń kameralyq-vokaldyq mýzyka jaýharlary shyrqalady. «Astana Opera» Kameralyq zalynda vokalıster - Qazaqstannyń eńbek sińirgen qaıratkerleri Dına Hamzına, Bıbigúl Januzaq, Janat Shybyqbaev, Azamat Jyltyrkózov, Qazaqstannyń eńbek sińirgen ártisi Ǵalııa Baıǵazınova, Ásem Sembına, Almat Іzbambetov, sonymen qatar, aspapshy mýzykanttar - Qazaqstannyń eńbek sińirgen qaıratkeri Baǵdat Ábilhanov, Áshim Ońaıbekov (skrıpkı), Kýrvanjan Ahatov (vıolonchel), Raýshan Beskempirova (fortepıano) óner kórsetedi.

30 sáýir kúni saǵat 19.00-de Astana Piano Passion V halyqaralyq klassıkalyq mýzyka festıvali men jas pıanıster baıqaýynyń promo-aktsııasy aıasynda «Has sheberge tartý» kontserti ótedi. Solıst - halyqaralyq baıqaýlardyń laýreaty Danııar Esimhanov - óz óner kórsetýin ustazy, ataqty pıanıst, KSRO Halyq ártisi, Memlekettik syılyqtardyń laýreaty Vladımır Vsevolodovıch Kraınevtiń (1944-2011) 75 jyldyǵyna arnamaq. Mýzykalyq kesh aıasynda - I.S.Bahtyń Aǵylshyn sıýıtasy lıa mınor, L. van Bethovenniń № 31 sonatasy lıa-bemol major, F.Lısttiń № 2 balladasy sı mınor, S.Rahmanınovtyń Bes prelıýdııasy shyrqalady.