Sáýir aıynan bastap Kongo-Qyrym gemorragııalyq qyzbasynyń 33 jaǵdaıy tirkeldi

ASTANA. QazAqparat – Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetova Kongo-Qyrym gemorragııalyq bezgegin taralýy jaǵdaıyna qatysty túsinik berdi aıtty, dep habarlaıdy QazAqparat tilshisi.

«Kongo-Qyrym gemorragııalyq qyzba boıynsha qolaısyz eldi mekenniń aınalasynda sanıtarııalyq-qorǵaý aımaqtary jáne býferlik aımaqtar quryldy. Mal qoralary kenege qarsy óńdeýmen qamtyldy, 248 eldi mekenniń aınalasynda sanıtarııalyq-qorǵaý aımaqtary jáne 1030 eldi mekende býferlik aımaqtar quryldy. 7 mln astam mal basy jáne mal qoralary kenege qarsy óńdeýmen qamtyldy. Kongo-Qyrym gemorragııalyq qyzbasy boıynsha epıdemıologııalyq jaǵdaı byltyrǵy deńgeıde», - dedi A. Esmaǵambetova Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, bıylǵy sáýir aıynan bastap Kongo-Qyrym gemorragııalyq qyzbasynyń 33 jaǵdaıy tirkeldi. Sonyń arasynda 13 oqıǵa Túrkistan oblysynda, 11 jaǵdaı Qyzylorda oblysynda, 7 jaǵdaı Jambyl oblysynda, bir derek Aqtóbe oblysynda jáne taǵy bireýi Shymkent qalasynda tirkeldi.

«Bul derekterdiń 53 paıyzynda (16 jaǵdaı) adamdardy kene shaqqan, 30 paıyzynda (10 jaǵdaı) maldy kútip baǵý kezinde aýrýǵa shaldyqqan, sondaı-aq 3 paıyzynda (1 jaǵdaı) naýqas endemııalyq aımaqtarda tabıǵatta boldy. Bul indetten 5 naýqas qaıtys boldy (Qyzylorda oblysy – 3, Jambyl jáne Túrkistan oblystarda 1 jaǵdaıdan), 3 naýqas em alyp jatyr, qalǵan naýqastar emdelip shyqty. Kongo-Qyrym gemorragııalyq qyzbasynyń epıdemııalyq kezeńi salqyn túskenge deıin jalǵasady», - dedi vıtse-mınıstr.

Budan buryn habarlanǵandaı, bıyl shilde aıynda Qyzylorda oblysynda Kongo-Qyrym qandy bezgeginen bir adam kóz jumdy.