Saýdııalyq hanzada munaıdyń taýsylatynyn eskertip, balama qýat kózderine mán berýdi usynady
ASTANA. 30 shilde. QazAqparat - Saýdııalyq hanzada ári tasy órge domalaǵan kásipker ál-Ýálıd bın Talal Tvıtter áleýmettik jelisi arqyly osy eldiń munaı mınıstri Áli ál-Naımge ashyq hat joldady. Bul hat bılik basyndaǵy barlyq azamattarǵa arnalǵan dese de bolady. Onda el ekonomıkasyn ártaraptandyrý máselesi tótesinen qoıylǵan.
«Korol Abdollanyń jıeni óz joldaýynda el bıýdjetiniń búıiri tek munaıdan túsken tabystan shyǵyp otyrǵanyn tilge tıek etken. Sanmen órnektegende Saýd Arabııasy bıýdjetiniń 92 paıyzy tek munaıdan túsken paıdadan quralady eken. Buǵan qosa, OPEK-ke múshe elderde óndiriletin munaıǵa degen suranys damyǵan memleketterde qatparly gazǵa (tabıǵı gazǵa qaraǵanda óndirilýi áldeqaıda qıyn bolǵanyna qaramastan onyń qory aıtarlyqtaı mol) baılanysty kúrt tómendep ketetin kórinedi», - dep jazady muslim.kz saıty.
Aıtylǵan máselege oraı hanzada erte bastan qamdanyp, el ekonomıkasyn reformalaý týraly másele kótergen. Sonyń ishinde, kún jáne ıadrolyq qýat kózderin damyta otyryp, ishki naryqta munaıdyń úlesin azaıtýdy usynyp otyr. Sondaı-aq, hanzada munaıdy satýdan túsken valıýtalyq qordy basqarý úshin táýelsiz qor qurýdyń qajettiligine toqtalǵan. Atalmysh qordyń mólsheri 2013 jyly 676 mlrd. dollarǵa jetken bolatyn. Álemdegi qaltasy qalyń mıllıarderlerdiń aty-jónin jyl saıyn jarııalap otyratyn Forbes jýrnalynyń tiziminde ál-Ýálıd bın Talal 26-shy orynǵa taban tiregen eken. Onyń dáýleti 20 mlrd dollarǵa baǵalanyp otyr.
