Saýdııalyq dáriger jaraqatty tez jazatyn ádis oılap tapty
ASTANA. 1 mamyr. QazAqparat - Saýd Arabııasy koroliniń medıtsınalyq ýnıversıtetinde oqıtyn Sámııa ásh-Shýlı londondyq Kıngs kolledjinde tájirıbe jınaqtaı júrip, mańyzdy ǵylymı jańalyq ashty. Immýnologııa jáne allergııalyq aýrýlar salasynyń sońyna túsken ol sozylmaly syrqattan nemese obyrdan paıda bolatyn jaraqattardy jazýda CD46 membranalyq aqýyzdyń belsendi rólin jańalyq etip ashty. Bul jaıynda Maktoob habar taratty.
Bul jańalyqtyń mańyzdylyǵy sonda, ımmýnologtarǵa osy ýaqytqa belgisiz bolyp kelgen atalmysh aqýyzdyń belsendi rólin anyqtaýda jatyr. Aldaǵy ýaqytta klınıkalyq deńgeıdegi synaqtan ótse, bul jańalyqty dárigerler syrqattardy emdeýde qoldanady. Sámııa ásh-Shýlıdiń bul jańalyǵy brıtandyq ımmýnologtar qaýymdastyǵynyń (BSI) patentine ıe boldy.
muslim.kz saıtynyń jazýynsha, Ulybrıtanııadaǵy Saýd Arabııasynyń elshisi Muhammed Naýaf Saýd ta atalmysh jańalyqtyń mańyzdylyǵyn eskerip, Sámııa ásh-Shýlıge qurmet kórsetti. Sámııa ásh-Shýlı keleshekte saýdııalyqtardyń óz múmkindikterin tanytyp, álemdik ǵylymǵa mol úles qosatynyna senim bildirdi. Bir aıta keterligi, Sámııa ásh-Shýlı tek medıtsınamen shuǵyldanyp qana qoımaı, sonymen qatar poezııa men ádebıetke de áýestigi bar kórinedi. Ol osy ýaqytqa eki óleńder jınaǵyn shyǵaryp úlgerdi. Qazir úshinshisin jazý ústinde.
