Saudi Aramco gaz óńdeý jobasyna 11 mlrd dollar ınvestıtsııa tartty
ASTANA. KAZINFORM — Bul kelisim Saýd Arabııasyndaǵy eń iri gaz jobasynyń damýyna sheteldik kapıtal tartýǵa jáne aktıvterdi tıimdi paıdalanýǵa múmkindik beredi, dep jazdy Kazinform agenttiginiń menshikti tilshisi.
Saýd Arabııasynyń munaı-gaz kompanııasy Aramco halyqaralyq ınvestorlar konsortsıýmymen, onyń ishinde BlackRock tobyna kiretin Global Infrastructure Partners (GIP) basqarýyndaǵy qorlarmen, 11 mıllıard dollar kólemindegi keri jaldaý kelisimin jasasty.
Bul qarajat koroldiktegi eń iri gaz ken orny — Jafýradaǵy ınfraqurylymdy damytýǵa baǵyttalady. Bul týraly Aramco kompanııasy beısenbi kúni habarlady.
We announce the signing of a USD 11 billion investment in our Jafurah midstream assets, a strategic transaction that reinforces global confidence in our long-term vision and supports the Kingdom’s growing gas demand
— aramco (@aramco) August 14, 2025
Learn morehttps://t.co/sEr8rbMuGg pic.twitter.com/AOKRqKSM8q
Kelisim sharttaryna sáıkes, arnaıy qurylǵan Jafurah Midstream Gas Company (JMGC) kompanııasy Jafýradaǵy gaz óńdeý zaýyty men «Rııas» fraktsııalaý qondyrǵysyn 20 jyl merzimge paıdalaný quqyǵyna ıe bolady, keıin olardy Aramco-ǵa keri jalǵa beredi.
Osy úshin Aramco JMGC kompanııasyna shıki gazdy óńdeý jáne daıyndaý quqyǵy úshin aqy tóleıtin bolady. Bul rette Aramco JMGC-nyń 51% aktsııasyn saqtap qalady, al qalǵan 49% ınvestorlarǵa ótedi. Kelisim óndiris kólemine shekteý qoımaıdy jáne standartty sharttar oryndalǵan soń aıaqtalady.
Jafýra ken orny Saýd Arabııasyndaǵy munaı óndirisimen baılanysy joq eń iri gaz jobasy bolyp sanalady. Onyń qorlary shamamen 229 trıllıon tekshe fýt shıki gaz jáne 75 mıllıard barrel kondensat dep baǵalanýda.
Bul joba Aramco-nyń 2030 jylǵa qaraı gaz óndirisin 60%-ǵa arttyrý josparynyń negizgi bóligi bolyp tabylady. Bul el ishindegi jáne syrtyndaǵy ósip kele jatqan suranysty qamtamasyz etýge baǵyttalǵan.
— Jafýra — bizdiń gaz óndirisin ulǵaıtý boıynsha ambıtsııaly baǵdarlamamyzdyń irgetasy, — dedi Aramco prezıdenti jáne bas atqarýshy dırektory Amın Naser.
Onyń aıtýynsha, alǵashqy óndiris kezeńi bıyl bastalady, al kelesi kezeńder belsendi iske asyrylý ústinde. Naser ken orny munaı-hımııa ónerkásibin shıkizatpen qamtamasyz etip, jasandy ıntellekt derekter óńdeý ortalyqtary sııaqty jańa salalardy energııamen qamtamasyz etetinin aıtty.
GIP basshysy Adebaıo Ogýnlesı Aramco-men seriktestik jahandyq naryqqa taza otynmen qamtamasyz etýge, energetıkalyq qaýipsizdik pen qoljetimdi baǵany usynýǵa kómektesetinin atap ótti.
Aramco-nyń málimetinshe, bul óńirdegi eń iri gaz jobasyna ınvestıtsııa salý múmkindigi Azııa men Taıaý Shyǵystyń iri ınstıtýtsıonaldyq kompanııalaryn qosa alǵanda, búkil álemdegi ınvestorlardyń qyzyǵýshylyǵyn arttyrdy. Kelisim Aramco-ǵa óz aktıvterin ońtaılandyryp, Jafýra ken ornyn ıgerýden qosymsha tabys alýǵa jol ashady.
Buǵan deıin Saýd Arabııasynyń Sırııa ekonomıkasyna 6 mlrd dollar ınvestıtsııa salatyny habarlanǵan bolatyn.
AQSh pen Saýd Arabııasy qorǵanys salasynda 142 mlrd dollarlyq kelisimge qol qoıdy.