Saýdany damytyp, logıstıkany keńeıtý: TMD Syrtqy ister mınıstrleri keńesiniń qorytyndysy shyqty

ALMATY. KAZINFORM — Almatyda Táýelsiz Memleketter Dostastyǵy Syrtqy ister mınıstrleri keńesiniń kezekti otyrysy aıaqtaldy.

Keńesti TMD Syrtqy ister mınıstrleri keńesiniń tóraǵasy, Tájikstannyń Syrtqy ister mınıstri Sırodjıddın Mýhrıddın men TMD Bas hatshysy Sergeı Lebedev qorytyndylady.

— Aldaǵy aılarǵa mınıstrlik is-sharalarynyń tutas serııasy josparlanǵan, bul osy jyl Dostastyq qyzmetiniń barlyq salasynda joǵary iskerlik belsendilik kezeńi bolatynyn aıqyn kórsetedi, — dedi Sırojıddın Mýhrıddın .

Ol kezdesý barysynda halyqaralyq kún tártibindegi ózekti máseleler talqylanǵanyn, sonymen qatar birqatar problematıvti taqyryp boıynsha qatysýshy elderdiń pikiri men kózqarastary birdeı ekenin atap ótti.

Saıası dıalogty odan ári nyǵaıtý, qaýip-qaterlerge qarsy turý, saýda-ekonomıkalyq yntymaqtastyqty keńeıtý, kólik-logıstıkalyq áleýetti arttyrý, Dostastyq memleketteri arasyndaǵy mádenı-gýmanıtarlyq baılanystardy damytý máselelerine erekshe nazar aýdaryldy.

— Kelissózder barysynda tájik tarapy aımaqtyq qaýipsizdikti nyǵaıtýǵa, ekonomıkalyq yntymaqtastyqty keńeıtýge, kólik-logıstıkalyq baılanystardy damytýǵa, sondaı-aq qatysýshy memleketter arasyndaǵy gýmanıtarlyq jáne mádenı baılanystardy tereńdetýge basa nazar aýdara otyryp, osy jyly TMD elderinde atqarylatyn basym baǵyttaryn belgiledi, — dedi Tájikstan SІM basshysy.

Otyrys qorytyndysy boıynsha memleket basshylaryna usynystar joldaý týraly sheshim qabyldandy. Atap aıtqanda, Mınıstrler keńesi TMD-ǵa múshe memleketterdiń 2026-2030 jyldarǵa arnalǵan shekaralyq jáne syrtqy shekaralyq qaýipsizdikti nyǵaıtý salasyndaǵy yntymaqtastyq baǵdarlamasyn qoldady.

Sondaı-aq otyrysta TMD-da Volonterler forýmyn ótkizý jónindegi is-sharalar talqylandy. 

Osy tusta Sergeı Lebedev Qazaqstan Prezıdentiniń TMD volonterler forýmyn ótkizý týraly bastamasyn atap ótti. 

— Bul bastama joǵary deńgeıde qoldaý tabatynyna senimdimin, kem degende, bul úshin barlyq alǵysharttar bar, — dep qosty ol.

TMD ınstıtýtsıonaldyq tetikteri turaqty jumys isteýin qamtamasyz etý maqsatynda normatıvtik-quqyqtyq bazany jetildirýge baǵyttalǵan birqatar qujatqa qol qoıyldy. Olardyń qatarynda TMD-ǵa qatysýshy memleketterdiń Turaqty ókiletti ókilderiniń Keńesi týraly ereje, TMD qarýly kúshteriniń birlesken baılanys júıesin qurý jáne jumys isteý qaǵıdattary týraly ereje, sondaı-aq azamattyq, otbasylyq jáne qylmystyq ister boıynsha quqyqtyq kómek kórsetý týraly konventsııaǵa ózgerister men tolyqtyrýlar engizý týraly hattamalar bar.

TMD Bas hatshysy qazaqstandyq tarapqa Táýelsiz Memleketter Dostastyǵy Syrtqy ister mınıstrleri keńesiniń otyrysyn joǵary deńgeıde uıymdastyrǵany úshin alǵys aıtty.

Aıta keteıik, kúzde TMD elderi SІM keńesiniń kelesi otyrysy Dýshanbede ótedi.