Saýdagerler taýarynyń baǵasyn Qytaıda basqa, Qazaqstanda basqa somamen kórsetedi

NUR-SULTAN. QazAqparat - Kásipkerler zańmen belgilengen kedendik tólemder men salyqtan jaltarýǵa tyrysty. Bul týraly Memlekettik kirister komıtetine silteme jasap QazAqparat habarlaıdy.

Komıtet taýarlardy jóneltýshi eldiń eksporttyq deklaratsııalarynan aqparatpen ózara almasý týraly halyqaralyq sharttardy jasasý boıynsha josparly jumys júrgizýde.

Naqty ýaqyt rejıminde taýarlardyń qunyn jáne olardyń jóneltýshi elde eksporty kezinde kórsetilgen sanyn Qazaqstannyń kedendik deklaratsııalarynda qazaqstandyq ımporttaýshylar málimdegen málimettermen salystyrý tetigi iske asyryldy.

Bul rette deklaranttardyń taýar týraly jalǵan aqparat jarııalaý faktileri anyqtalyp otyr.

Máselen, osy jyldyń mamyr aıynda QHR-dan lıýstra ımporttaldy. Deklarant partııanyń qunyn 11 myń dollar dep kórsetti.

Alaıda Qytaıdyń keden qyzmetinen aqparat suratylyp, olardyń málimeti boıynsha eksport kezinde bul júktiń quny 240 myń dollardy quraǵany anyqtalǵan.

Osylaısha, ımporttalǵan taýarlardyń quny 22 ese tómendetildi, al oryndalmaǵan salyq mindettemeleriniń somasy 25 mln teńgeni qurady.

QHR-nyń keden qyzmetiniń málimetterine sáıkes, Qazaqstanǵa eksporttalatyn júkterdiń birinde «Smart-teledıdar» taýary jóneltildi.

Alaıda ımporttaýshy kedendik tólemderdi tóleýden jaltarý maqsatynda «televızııalyq qorap» taýaryn kórsetti.

Osyǵan oraı kedendik saraptama júrgizilip, Qytaıdan kelgen derekter rastaldy.

Júrgizilgen jumystyń arqasynda aǵymdaǵy jyldyń birinshi jartyjyldyǵynda jalpy somasy 15,8 mıllıard teńge taýardyń kedendik qunyn tómendetý faktileriniń joly kesildi, sondaı-aq Qazaqstandaǵy ımport pen Qytaıdan eksport arasyndaǵy aıyrmashylyq 1,4 mıllıard dollarǵa deıin tómendedi.

2017 jyly bul kórsetkish 6,8 mıllıard dollarmen 59% quraǵan.

Syrtqy ekonomıkalyq qyzmettiń keıbir qatysýshylary qabyldanǵan sheshimdermen kelispeıtinin atap ótken jón.

Olar memlekettik kirister komıtetiniń júrgizilip jatqan josparly jumysynyń bedelin túsirýge barynsha tyrysyp, zańdy túrde belgilengen tólemderdi tóleýden jaltaryp baǵýda.

Búgingi tańda komıtet Qytaımen, Ázirbaıjanmen, Grýzııamen, Ýkraınamen, Ózbekstanmen, Iranmen, Túrkimenstanmen jáne Túrkııamen aqparat almasý týraly shart jasasty.

Sondaı-aq tıisti kelisim jasasý úshin Tájikstan keden qyzmetimen kelissóz júrgizip jatyr.

Osy baǵyttaǵy jumys aldaǵy ýaqytta da jalǵasyn tabady.

Foto: pbs.twimg.com