Saýda jelilerimen ústeme baǵa lımıti jóninde 60 memorandým jasaldy – Úkimet

ASTANA. QazAqparat – QR Premer-mınıstri Álıhan Smaıylov saýda jelilerimen áleýmettik mańyzy bar ónimderge ústemeaqy lımıtin belgileý jóninde memorandým jasalǵanyn aıtty, dep habarlaıdy QazAqparat tilshisi.

«Saýda jáne ıntegratsııa mınıstrligi Saýda komıtetiniń aýmaqtyq departamentterinde baılanys ortalyqtary uıymdastyrylǵan. Zańnama normalaryn buzǵan sýbektiler ákimshilik jaýapkershilikke tartylady. Qazirgi tańda áleýmettik mańyzy bar azyq-túlik taýarlaryna 10%-dan aspaıtyn mólsherde saýda ústemesin belgileý boıynsha saýda jelilerimen 60-qa jýyq memorandým jasaldy», - dep jazdy Álıhan Smaıylov depýtattyq saýalǵa bergen jaýabynda.

Onyń aıtýynsha, Úkimet jergilikti atqarýshy organdardyń baǵa belgileý tizbegi boıynsha deldaldyq shemalardy tergeý jumystaryn úılestirýdi qamtamasyz etedi.

Negizgi mindetter – deldaldardy anyqtaý jáne jolyn kesý.

«Bul rette, kóbinese áleýmettik mańyzy bar azyq-túlik taýarlarynyń baǵasyn úı janyndaǵy dúkender kóteredi. Oǵan qosa, mıkro jáne shaǵyn kásipkerlikti tekserýge moratorııdiń qoldanylýyna baılanysty memlekettik organdarǵa josparly tekserý júrgizýge shekteý bar. Jospardan tys tekserýler halyqtyń shaǵymdary negizinde ashylady (QR Kásipkerlik Kodeksiniń 144-babynyń 3 - tarmaǵy), onyń qorytyndysy boıynsha áleýmettik mańyzy bar azyq-túlik taýaryn satyp alýǵa ilespe jáne júkqujat qujattarynyń bolmaýyna baılanysty buzýshylyqtar anyqtalady», - dep tolyqtyrdy Premer.