Saýda mınıstrligi jalǵan aqparat taratatyn alaıaqtardan saq bolýǵa shaqyrdy
ASTANA. KAZINFORM — Qazaqstan Respýblıkasy Saýda jáne ıntegratsııa mınıstrliginiń Tehnıkalyq retteý jáne metrologııa komıteti (TRMK) alaıaqtardyń KTRM qyzmetkerleri retinde ózderin tanystyryp, sonyń ishinde tehnıkalyq retteý boıynsha «E-KTRM» aqparattyq júıesimen jumys isteýge kómek kórsetý týraly jalǵan aqparat taratý jaǵdaılarynyń jıilegenin habarlady.
Mınıstrlik TRMK qyzmetkeri retinde ózderin tanystyratyn alaıaqtar Qazaqstan Respýblıkasy azamattaryn shatastyryp, olardyń jeke derekterin ıemdený jáne aqshalaı qarajatyn urlaý maqsatynda áreket etetinin eskertti.
— Osyǵan baılanysty TRMK belgisiz «TRMK qyzmetkerlerinen» kelip túsken qońyraýlar men messendjerler arqyly habarlamalarǵa jaýap bermeı, áńgimeni dereý toqtatýǵa jáne alaıaqtyq áreketterge qatyspaýǵa keńes beredi. Budan keıin quqyq qorǵaý organdaryna júginý qajet, — delingen habarlamada.
Vedomstvodan TRMK qyzmetkerleri memlekettik qyzmetshi retinde azamattar men kásipkerlik sýbektilerine kommertsııalyq qyzmetter usynbaıtynyn ári azamattardyń jeke derekterin — jeke kabınetke kirý úshin logın/qupııasózderdi, SMS arqyly keletin kodtardy suramatynyn eskertti. Jeke derekterdi úshinshi tulǵalarǵa berý arqyly alaıaqtardyń sizdiń jeke aqparatyńyzǵa qol jetkizý qaýpi týyndaıtynyna nazar aýdardy.
«E-KTRM» aqparattyq júıesiniń jumysyna baılanysty suraqtar týyndaǵan jaǵdaıda Qazaqstan Respýblıkasy Saýda jáne ıntegratsııa mınıstrliginiń atalǵan júıeni súıemeldeıtin qurylymdyq bólimshesi — Tsıfrlyq transformatsııa jáne taýarlardy tańbalaý departamentine júginý usynylady.
Eske sala keteıik, buǵan deıin «Quqyqqa qaıshy kontent» taratqandar jalǵan aqparat taratý baby boıynsha jazaǵa tartylýy múmkin ekenin jazǵan edik.