Saýda jáne ıntegratsııa mınıstrligi el aýmaǵynan shyǵarýǵa, kirgizýge tyıym salynǵan taýarlardy atady
Saýda jáne ıntegratsııa mınıstrligi el aýmaǵynan shyǵarýǵa nemese shekaradan kirgizýge tyıym salynǵan taýar túrlerin atady. Máselen, 11 qazannan bastap bıdaıdy úshinshi elderden jáne EAEO elderinen Qazaqstan aýmaǵyna avtokólikpen ákelýge tyıym salý uzartylady. Tyıym salý merzimi - 6 aı, dep habarlaıdy QazAqparat.
Sonymen birge 15 qazanǵa deıin Qazaqstan aýmaǵynan muzdatylǵan, jańa muzdatylǵan nemese salqyndatylǵan balyq túrlerin shyǵarýǵa tyıym salynatynyn da málimdedi.
"Bıylǵy 2 qarashaǵa deıin elden qara jáne tústi metaldardyń synyqtary men qaldyqtarynyń jekelegen túrlerin áketýge tyıym salynady.
Al 14 qarashaǵa deıin Qazaqstannan tas kómirdi, brıketterdi, túıirshikterdi jáne tas kómirden alynǵan qatty otynnyń uqsas túrlerin avtomobıl kóligimen áketýge bolmaıdy.29 qarashaǵa deıin Qazaqstan aýmaǵynan ammofos pen ammonıı nıtratyn avtomobıl kóligimen áketýge tyıym salyndy", - dep jazdy mınıstrlikten.
10 jeltoqsanǵa deıin temir jol nemese tramvaı joldaryna arnalǵan qylqan japyraqty aǵash shpaldaryn qospaǵanda, shyqqan eline qaramastan, aǵash materıaldarynyń jekelegen túrlerin elden áketýge tyıym salyndy.
"2024 jylǵy 27 qańtarǵa deıin Qazaqstan aýmaǵynan avtomobıl kóligimen benzınderdi, dızel otynyn jáne munaı ónimderiniń jekelegen túrlerin áketýge tyıym salyndy", - delingen vedomstvo habarlamasynda.
