Saýda jáne ekologııalyq qaýipsizdik: Qytaı men Ortalyq Azııa mınıstrleri Almatyda neni talqylady
ALMATY. KAZINFORM –– Almatyda syrtqy ister mınıstrleriniń «Ortalyq Azııa — Qytaı» formatyndaǵy VI kezdesýi aıaqtaldy.
Sharaǵa Qazaqstannyń syrtqy ister mınıstri Murat Nurtileý, Qytaı syrtqy ister mınıstri Van I, Qyrǵyzstan syrtqy ister mınıstri Jeenbek Kýlýbaev, Tájikstan syrtqy ister mınıstri Sırodjıddın Mýhrıddın, Ózbekstan syrtqy ister mınıstri Bahtıer Saıdov jáne Túrikmenstan ókili qatysty.
Kezdesýde saıası dıalogty nyǵaıtýǵa, saýda-ekonomıkalyq baılanystardy keńeıtýge, kóliktik ózara baılanysty damytýǵa, syn-tegeýrinder men qaýip-qaterlermen birlesken kúreske, sondaı-aq óńirdegi ornyqty damý men ekologııalyq qaýipsizdik máselelerine basty nazar aýdaryldy. Ortalyq Azııanyń Qytaımen ózara syılastyq pen teńdik qaǵıdattarynda kópjaqty ózara is-qımylynyń arhıtektýrasyn jaqsartý boıynsha usynystar talqylandy.
Taraptar qazirgi zamanǵy syn-tegeýrinderge teńdestirilgen kózqarastardyń qajettiligin atap ótip, ózara tıimdi damý jolyndaǵy qadamdardy kelisti.
M.Nurtileý óz sózinde óńirdegi turaqtylyqty qamtamasyz etý úshin negizgi salalardaǵy yntymaqtastyqty odan ári keńeıtý qajettigine nazar aýdara otyryp, «Ortalyq Azııa — Qytaı» kópjaqty formatyn nyǵaıtýdyń mańyzdylyǵyn atap ótti.
–– Formatymyzdyń «Ortalyq Azııa +» tetikteri arasynda flagmanǵa aınalýy, al kóshbasshylardyń aldaǵy kezdesýi máńgilik dostyq pen órkendeýdiń jańa kezeńin ashýy úshin barlyq jaǵdaı jasalyp jatyr, — dedi Qazaqstan SІM basshysy.
Otyrysqa qatysýshylar jahandyq syn-qaterler jaǵdaıynda syndarly dıalogty jalǵastyrýdyń, baılanystardy damytýdyń jáne basym baǵyttar boıynsha kúsh-jigerdi úılestirýdiń mańyzdylyǵyna nazar aýdaryp, osy formattaǵy turaqty kezdesýlerge daıyn ekenin bildirdi.
Іs-shara qorytyndysy boıynsha syrtqy ister mınıstrleri Aqparattyq kommıýnıkeni qabyldady, onda «Ortalyq Azııa — Qytaı» formaty sheńberinde tatý kórshilik, ornyqty damý jáne kópjaqty ózara is-qımyldy tereńdetý qaǵıdattaryna ortaq mindetteme bekitildi.
Osyǵan deıin Murat Nurtileý Qytaıdyń Ortalyq Azııa elderimen taýar aınalymynyń jartysy Qazaqstanǵa tıesili ekenin aıtqan bolatyn.
Eske salaıyq, 25 sáýir kúni QR Premer-mınıstriniń orynbasary — Syrtqy ister mınıstri Murat Nurtileý jáne QKP OK saıası bıýrosynyń múshesi, Qytaı Halyq Respýblıkasynyń syrtqy ister mınıstri Van I Qazaqstan men Qytaı arasyndaǵy Strategııalyq dıalogtyń ekinshi otyrysyna qatysqan edi.