Saýda vıtse-mınıstri: Reseı bizge tıesili naryqtardy jaýlaı bastady

ASTANA. KAZINFORM — Májiliste Qazaqstannyń aýyl sharýashylyǵyndaǵy eksport áleýetine arnalǵan dóńgelek ústel ótip jatyr. Jıynda Saýda jáne ıntegratsııa vıtse-mınıstri Janel Kúshikova Reseı eki aradaǵy kelisimderdi saqtaı bermeıtinin aıtty.

— Qazaqstan etine degen kórshi elderdiń suranysy joǵary ekenin kórip otyrmyz. Mysaly, Ortalyq Azııada halyq sanynyń ósýine baılanysty suranys sıyr etine 21 paıyz, qutydaǵy sýǵa 24 paıyz, ósimdik maıyna 32 paıyz, qantqa 6,4 ese, kartopqa 58 paıyz artqan. Sondaı-aq, Aýǵanstanǵa eksport kólemin ulǵaıtsaq degen josparymyz bar, — degen vıtse-mınıstr Qytaı naryǵynyń áleýetin áli de ıgere túsý kerektigine toqtaldy.

Onyń sózinshe, Qazaqstannyń aýyl sharýashylyǵyndaǵy eksporttyq áleýetin tolyq iske asyrýda keıbir máseleler bar.

— Árıne, joǵaryda aıtylǵan múmkindiktermen birge qaterler de bar. Negizgi qater saladaǵy iri eksporttaýshy elderden qysym baıqalyp otyr. Mysaly, Reseı Federatsııasy sanktsııa shekteýlerine baılanysty Qazaqstanǵa tıesili bolyp eseptelgen naryqtarǵa kóbirek shyǵyp jatyr. Bul tusta, árıne, bizge básekelesý kerek. Biraq, aýyl sharýashylyǵy taýarynyń basty ereksheligi veterınarııa, fıtosanıtarııa sııaqty baǵyttardaǵy kelisimder ekijaqtyń maquldaýy boıynsha qabyldanatynynda. Áıtpese qolda bar kelisimder sóz júzinde óz taýarlarymyzdy kózdegen naryqtarymyzǵa jetkizýge múmkindik beredi, — dedi ol.

Atalǵan jıynda Qazaqstannyń Qytaıǵa eksporttaıtyn aýyl sharýashylyǵy daqyldarynyń kólemi artatyny aıtyldy.