«Saýda úzdigi» respýblıkalyq baıqaýynda qyzylordalyqtardyń mereıi ústem boldy
QYZYLORDA. QazAqparat - «Saýda úzdigi - 2017» respýblıkalyq baıqaýynda qyzylordalyq 3 kompanııa eń úzdik kompanııa retinde tanyldy, dep habarlady QazAqparat tilshisi oblystyq kásipkerler palatasyna silteme jasap.
QR Ulttyq ekonomıka mınıstrliginiń qoldaýymen «Atameken» UKP men Qazaqstannyń saýda kásiporyndary qaýymdastyǵynyń birlesip ótkizgen baıqaýy bıyl Atyraý qalasynda ótken bolatyn.
«Saýda úzdigi» baıqaýynyń maqsaty - kásipkerlerdiń kásibı qyzmetine joǵarǵy baǵa berýmen qatar Qazaqstannyń saýda kásiporyndarynyń úzdik basshylaryn anyqtaý, servıs deńgeıin jáne qyzmet kórsetý sapasyn kóterý, elimizdegi saýda salasyna zamanaýı formalardy engizý bolyp tabylady.
Atalmysh baıqaýǵa qatysqan Qyzylorda oblysynyń kásipkerleri birneshe nomınatsııalar boıynsha І oryndy jeńip aldy.
Atap aıtqanda, «Úzdik bólshek saýda kásiporny» nomınatsııasy boıynsha «Braýnıs Qazaqstan» JShS І oryn;
- Úzdik demalys aımaǵy nomınatsııasy boıynsha «Nur-nazar» JShS-niń «Araı» sporttyq-saýyqtyrý kesheni, «Úzdik kóterme saýda kásiporny» nomınatsııasy boıynsha «Abzal jáne K» TS birinshi oryndardy enshiledi.
«Jyldyń úzdik basshysy» nomınatsııasynyń gran-prıi «Abzal jáne K» TS-niń dırektory Murat Sársenbaevqa berildi.
Aıta ketý kerek, qyzylordalyqtardyń baıqaý qorytyndysymen І orynǵa ıe bolýyna oraı, kelesi jyly «Saýda úzdigi» respýblıkalyq baıqaýy Qyzylorda oblysynda ótetin boldy.
