Saýda úıinde er kisiler úshin kútý bólmesi paıda boldy
ASTANA. QazAqparat - Qytaıda saýda ortalyqtarynyń birinde dúken aralaýdy unatpaıtyn, alaıda, jubaılaryna serik bolýǵa májbúr er kisilerge arnalǵan boks-keńseler paıda boldy.
BELTA agenttiginiń jazýynsha, oıyn-saýyq bólmelerin Shanhaıdaǵy saýda ortalyǵy oılap tapqan. Shyny bokstarǵa ústel, oryndyq jáne 90-jyldarǵy oıyndar júktelgen kompıýter qoıylǵan. Bul qyzmet testilik rejimde synaqtan ótkizilip jatqandyqtan, ázirge ol tegin. Degenmen, keleshekte oǵan belgili bir aqy qoıylýy múmkin.
Bólmeler er adamdardyń biriniń kóńilinen shyǵyp jatsa, bireýler onyń tarlyǵy men jeldetkishterdiń bolmaýyna qynjylys bildirýde.
Atap ótilgendeı, qytaılyq áleýmettik jelilerde atalmysh bokstarǵa qatysty qaljyńdy jazbalar shyǵa bastady.
