Saýda úıi men ákimdikti «jaryp jibermek» bolǵan qaraǵandylyq ustaldy
QARAǴANDY. QazAqparat – Qaraǵandy qalasyndaǵy barlyq jedel qyzmetterdi dúrliktirgen 39 jasar azamat ustaldy. Ol oblys ortalyǵyndaǵy saýda úıleriniń birinde jarylys uıymdastyramyn dep qorqytqan, dep habarlaıdy QazAqparat tilshisi.
11 tamyz kúni saǵat 12.13 shamasynda 102 telefonyna belgisiz azamat habarlasyp, qaladaǵy «City mall» saýda úıin jaryp jiberemin dep qorqytqan.
Oblystyq Polıtsııa departamentiniń jedel kezekshisimen oqıǵa orynyna barlyq jedel qyzmetter jumyldyryldy. Patrýldik polıtsııa polkiniń qyzmetkerlerimen oqıǵa oryny qorshaýǵa alynyp, ǵımarattan 240 adam syrtqa shyǵaryldy. Bir saǵat ótkennen keıin, belgisiz azamat 102 telefonyna qaıta qońyraý shalyp, oblystyq ákimdiktiń ǵımaratyna jarylǵysh zat qoıǵany týraly habarlady.
«Polıtsııa qyzmetkerlerimen jedel-izdestirý is-sharalary barysynda «Іzin sýtpaı» atalǵan iske qatysy bar degen kúdikpen 39-jastaǵy qala turǵyny anyqtalyp, ustalyp odan qońyraý shalǵan telefon tárkilenip alyndy. Sondaı-aq, polıtsııa qyzmetkerlerimen eki ǵımaratta tekserilip, jarylǵysh zat anyqtalǵan joq», - dep habarlady Qaraǵandy oblystyq PD baspasóz qyzmeti.
Qazirgi ýaqytta ustalǵan azamatqa qatysty QR Qylmystyq Kodeksiniń 273- babyna sáıkes sotqa deıingi tergeý amaldary bastalyp, tergeý júrgizilýde.
