Saýda ústemesin shekteý: Jumanǵarın 8 oblysta nátıje joq ekenin aıtty

ASTANA. KAZINFORM – Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ınflıatsııany turaqtandyrý máseleleri boıynsha keńes ótti. Bul týraly Úkimettiń baspasóz qyzmeti habarlady. 

Sońǵy eki aptada áleýmettik mańyzy bar azyq-túlik ónimderiniń ortasha baǵa ındeksi nóldik deńgeıde saqtalyp otyr. Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, qııar (-2,5%), balyq (-1,4%), alma (-0,5%), usaqtalǵan et (-0,3%), qaraqumyq pen sıyr eti (-0,2%), qatty irimshik pen jumyrtqa (-0,1%) baǵalary tómendegeni tirkeldi. Qyzanaq, sút, taýyq eti, súıekti sıyr eti jáne nan baǵalary turaqty. Sonymen qatar kókónis-jemis ónimderiniń baǵasy maýsymaralyq kezeńge baılanysty ósip kele jatqany baıqalady.

Baǵany turaqtandyrý maqsatynda aqpan aıynan bastap turaqtandyrý qorlaryndaǵy kókónisterdiń belsendi túrde satý bastaldy. Búgingi kúnge deıin aımaqtardaǵy saýda oryndaryna qoljetimdi baǵamen 57 myń tonnadan astam kókónis jetkizildi. Aqpan aıynda naryqqa qosymsha shamamen 80 myń tonna kartop, 11 myń tonna pııaz, 27 myń tonna sábiz jáne 19 myń tonna qyryqqabat shyǵarý josparlanyp otyr.

Jıyn barysynda maıly ónimder, atap aıtqanda kúnbaǵys maıynyń baǵasyn turaqtandyrý máselesine de erekshe nazar aýdaryldy. Vıtse-premer Aýyl sharýashylyǵy mınıstrligine otandyq zaýyttarda kúnbaǵys maıyn óndirý úshin fermerlerdi maıly tuqym satýǵa yntalandyratyn sharalar qabyldaýdy tapsyrdy. Bul shara fermerlerdi qoldaýǵa, kásiporyndardyń jumysyn qamtamasyz etýge jáne ishki naryqqa maı jetkizilimin arttyrýǵa múmkindik beredi.

Jyl basynan beri 72 aımaqtyq komıssııa otyrysy ótip, saýda ústemesin qoldaný tártibin buzýdyń 128 faktisi anyqtalǵan. Saýda salasynda memlekettik baqylaýǵa 218 bıznes sýbektisi qamtylǵan, jalpy salynǵan aıyppul somasy 3,7 mln teńge. Serik Jumanǵarın formaldy túrde ótip, saýda ústemesin shekteý boıynsha eshqandaı nátıje bermegen Qaraǵandy, Mańǵystaý, Qyzylorda, Atyraý, Qostanaı, Batys Qazaqstan, Aqtóbe jáne Pavlodar oblystaryndaǵy aımaqtyq komıssııalardyń jumysyn synǵa aldy.

Jıyn qorytyndysy boıynsha vıtse-premer jergilikti deńgeıde jeke jaýapkershilikti qamtamasyz etý qajettigin atap ótip, baǵa ósimin boldyrmaý, zańsyz baǵa ósýin toqtatý jáne áleýmettik mańyzy bar azyq-túlik taýarlarynda baǵa turaqtylyǵyn qamtamasyz etý boıynsha praktıkalyq jumystardy jandandyrýdy tapsyrdy. 

Aıta ketelik Almatyda azyq-túlik baǵasyn ustap turý úshin kásipkerlerge jeńildetilgen nesıe beriledi.