Saýda ústemesin asyryp qosqan kásipkerler jaýapkershilikke tartyldy

ASTANA. KAZINFORM — Jyl basynan áleýmettik mańyzy bar azyq-túlikke qatysty saýda ústemesiniń mólsherin buzǵany úshin 1 470 ákimshilik shara qabyldandy. Bul týraly Saýda jáne ıntegratsııa mınıstrliginen málim boldy. 

— Jyl basynan beri mınıstrliktiń aýmaqtyq departamentteri QR Ákimshilik quqyq buzýshylyq týraly Kodeksiniń 204-4-baby boıynsha kásipkerlik sýbektilerine qatysty áleýmettik mańyzy bar azyq-túlikke saýda ústemesiniń mólsherin buzǵany úshin Qazaqstan Respýblıkasynyń zańnamasyna sáıkes, 1 470 ákimshilik shara qabyldady (2024 jyly 1055 ákimshilik shara). Onyń ishinde kásipkerlik sýbektileri zańdy qaıtalap buzǵany úshin 242 ákimshilik shara qabyldady, ıaǵnı kásipkerlerge saýda ústemesiniń ruqsat etilgen mólsherin saqtamaǵany úshin aıyppul salyndy, — delingen mınıstrliktiń Kazinform agenttigine bergen jaýabynda.

Sonymen qatar, áleýmettik mańyzy bar azyq-túlikke shekti saýda ústemesiniń saqtalýyna memlekettik baqylaýdy kúsheıtý maqsatynda jaýapkershilikti qatańdatý boıynsha qoldanystaǵy zańnamaǵa túzetýler ázirlendi. 

— Atap aıtqanda, eskertý ákimshilik aıyppulmen aýystyryldy. Bul túzetý osy jyldyń 13 naýryzynda kúshine engen. Endi shekti saýda ústemesin saqtamaǵany úshin shaǵyn kásipkerlik sýbektilerine — 5, orta kásipkerlikke — 35 jáne iri kásipkerlikke 150 aılyq eseptik kórsetkish qarastyrylǵan. Bir jyl ishinde qaıta buzylǵan jaǵdaıda shaǵyn — 10, orta — 70 jáne iri kásipkerlik 300 aılyq eseptik kórsetkish somasynda aıyppul tóleıdi, — dep atalyp ótken vedomstvo aqparatynda.

Buǵan deıin elimizdegi dúken sórelerindegi azyq-túliktiń neshe paıyzy otandyq óndirýshilerge tıesili bolýy kerek ekenin jazǵan edik.