Saýda ústemesine qatysty kúsheıtilgen baqylaý júrgiziledi - Úkimet

NUR-SULTAN. QazAqparat – Áleýmettik mańyzy bar azyq-túlik taýarlaryna shekti mánder men shekti ruqsat etilgen baǵalardy engizý ádistemesi bekitildi. Bul týraly búgin Úkimet otyrysynda QR Premer-Mınıstriniń orynbasary - Saýda jáne ıntegratsııa mınıstri Baqyt Sultanov málim etti, dep habarlaıdy QazAqparat tilshisi.

«Búgingi tańda Saýda jáne ıntegratsııa mınıstrligi Áleýmettik mańyzy bar azyq-túlik taýarlaryna shekti mánder men shekti ruqsat etilgen baǵalardy engizý ádistemesin bekitti. Jańa ádisteme ınflıatsııanyń belgilengen dálizinde sórelerdegi baǵa ósimin shekteýge múmkindik beredi. Aǵymdaǵy jyldyń 1 toqsanyna shekti mánder bekitilgen», - dep túsindirdi B. Sultanov.

Onyń aıtýynsha, ákimdikter tarapynan saýda ústemesiniń mólsheri tıisti deńgeıde bolýyna jáne saýda jelileriniń syıaqy almaýyna kúsheıtilgen monıtorıng pen baqylaý júrgiziletin bolady. Osy jumysqa tutynýshylar qatysatyn bolady. Ústeme baǵany kóteretin saýda jelileri ákimshilik jaýapkershilikke tartylady.

«Tutastaı alǵanda, memlekettik organdardyń jumysy Jedel is-qımyldar josparynda kózdelgen barlyq sharalardy sapaly oryndaı otyryp, joǵary ınflıatsııa problemalaryn sheshýge baǵyttalatyn bolady», - dedi mınıstr.

Budan buryn habarlanǵandaı, Memleket basshysynyń ınflıatsııa deńgeıin tejeý jáne memlekettik retteý sharalaryn kúsheıtý jónindegi tapsyrmalaryn iske asyrý úshin salalyq memlekettik organdar birqatar sharalardy ázirledi. Vedomstvoaralyq is-qımyl Úkimet deńgeıinde úılestiriletin bolady.

Sonymen qatar kóp jaǵdaıda taýarlardyń baǵasyn bólshek saýda sýbektileri kóteredi, atap aıtqanda «úıdiń janyndaǵy dúkender». Osy dúkender kóbine 15 %-dyq saýda ústemesin saqtamaıdy.