Saýda salasynda 543 artyq talap bar – mınıstrlik

ASTANA. QazAqparat – Saýda jáne ıntegratsııa birinshi vıtse-mınıstri Arman Shaqqalıev salada basy artyq, negizsiz talaptar áli azaımaı turǵanyn másele etip kóterdi, dep habarlaıdy QazAqparat tilshisi.

«Saýda salasynda 52 retteý aktisin qaıta qaradyq. Qoldanystaǵy 1729 talaptyń ishindegi 543 talaptyń salany retteýdiń bazalyq talaptaryna sáıkes kelmeıtini anyqtaldy. Bul shamamen 31% degen sóz», - dedi ol vedomstvonyń keńeıtilgen alqasynyń májilisinde.

Arman Shaqqalıev taýar bırjalarynyń qyzmetin retteý baǵytynda qabyldanǵan sharalar týraly da málimet berdi.

«Saýdadaǵy órkenıetti formattardyń úlesin arttyryp, oıynshylarǵa qaýipsiz ári qolaıly jaǵdaı jasaý úshin 22 bazardy jańǵyrtý jumystary aıaqtaldy. Saýda salasyna 2022 jyldyń qańtar-qarasha aılarynda 590 mlrd teńge tartyldy. Qazirgi ýaqytta ekonomıka mınıstrligimen birlesip memlekettik qoldaý máselesi pysyqtalýda», - dedi Arman Shaqqalıev.