Saýda salasyndaǵy tsıfrlandyrý qarqynyn zertteıtin CART.IS nátıjesi jarııalandy
ASTANA. KAZINFORM – Saýda salasyndaǵy tsıfrlandyrý qarqynyn zertteıtin CART.IS nátıjesimen Saýda jáne ıntegratsııa mınıstrligi, QazTrade, memlekettik organdar men halyqaralyq uıym ókilderi tanysty.
Bul jumys Qazaqstannyń saýda salasyndaǵy tsıfrlandyrý qarqynyn baǵalap, jedeldetýdi qajet etetin baǵyttardy kórsetedi. Joba Eýropalyq odaq pen Halyqaralyq saýda ortalyǵynyń qoldaýymen júzege asýda.
Zertteý jumysy syrtqy ekonomıkalyq qyzmetke qatysy bar 27 negizgi qyzmetti qamtydy. Olardyń 81 %-y elektrondy formatta kórsetilse, 19 %-y áli de qaǵaz túrinde qalyp otyr. Sondaı-aq 15 memlekettik IT-júıe ózara baılanyssyz jumys isteıtini anyqtaldy, olardyń tek 11-i ǵana vedomstvoaralyq elektrondy júıege qosylǵan, al 14 júıe ıntegratsııany qajet etedi.
CART.IS derekteri kórsetkendeı, transshekaralyq rásimderdiń 60 %-y basqa elderdiń júıelerimen, eń aldymen Reseı, Qytaı, Ázerbaıjan, Ózbekstan jáne Qyrǵyzstanmen tsıfrlyq baılanysty qajet etedi. Mundaı baılanys bolmasa qujat rásimdeý qaıtalanyp, bıznes ókilderi qosymsha shyǵynǵa ushyraıdy.
Saýda jáne ıntegratsııa vıtse-mınıstri Aıdar Ábildabekov saýda rásimderin ońaılatý tek tsıfrlandyrýmen shektelmeı, memlekettik júıelerdiń úılesimdi arhıtektýrasyn qajet etetinin aıtty.
«CART.IS jaı zertteý emes. Bul – syrtqy saýdany jyldam, ashyq jáne boljamdy etýge baǵyttalǵan naqty qural», – dedi ol.
Eýropalyq odaqtyń Qazaqstandaǵy elshisi Aleshka Sımkıch óz sózinde Qazaqstan Orta Azııada tsıfrlyq transformatsııa salasyndaǵy kóshbasshy ekenin atap ótti.
«Qazaqstan tsıfrlyq úkimet pen qaǵazsyz saýdany damytýda úlken nátıjelerge qol jetkizdi. Bul – Eýropamen ekonomıkalyq baılanystardy keńeıtýge berik negiz», – dedi dıplomat.
Zertteý barysynda 12 memlekettik mekemeniń tek beseýinde ǵana tsıfrlandyrýmen aınalysatyn jeke departamentter bar ekeni anyqtaldy. QazTrade basqarma tóraǵasynyń orynbasary Nurlan Qulbatyrovtyń aıtýynsha, saýdany tolyq qaǵazsyz formatqa kóshirý Qazaqstannyń jyl saıynǵy saýda aınalymyn 10–15 %-ǵa arttyra alady.
«Bul bıznes shyǵyndaryn azaıtyp, eksporttyq áleýetti eseleı túsedi», – dedi ol.
CART.IS taldaýy «Ready4Trade: Transkaspıı kólik dálizi arqyly órkendeýge jol» jobasy aıasynda júrgizildi. Joba Eýropalyq odaqtyń qarjylandyrýymen jáne Halyqaralyq saýda ortalyǵynyń júzege asyrýymen iske asýda. Onyń maqsaty – saýda rásimderin jańǵyrtý, óńirlik baılanystardy nyǵaıtý jáne Ortalyq Azııa elderindegi shaǵyn jáne orta bıznesti qoldaý.
Halyqaralyq saýda ortalyǵy – Dúnıejúzilik saýda uıymy men BUU-nyń birlesken agenttigi, ol damýshy elderdiń kásiporyndaryn jahandyq naryqtarǵa shyǵýǵa járdemdesedi. Al Eýropalyq odaq 27 memleketti biriktirip, turaqty damý, demokratııa jáne erkin saýda qaǵıdattaryn ilgeriletedi.
Aıta keteıik, Saýda mınıstrligi «Altyn sapa» konkýrsyn jańa tsıfrlyq nomınatsııamen tolyqtyrmaq.