Saýda salasy 1,5 mıllıon adamdy jumyspen qamtyp otyr – mınıstrlik

ASTANA. KAZINFORM – QR Saýda jáne ıntegratsııa mınıstrligi birinshi jartyjyldyqqa arnalǵan saýda salasyndaǵy negizgi kórsetkishterdi jarııalady. Vedomstvonyń málimetinshe, atalǵan kezeńde saýda salasy turaqty ósimdi saqtap, el ekonomıkasynyń iri sektorlarynyń biri retinde qalyp otyr.

- Saýda salasy elimizdiń jalpy ishki óniminiń shamamen 19 paıyzyn quraıdy. Búginde salada 1,5 mıllıonnan astam adam jumyspen qamtylǵan. Respýblıka aýmaǵynda 748 545 kásipkerlik sýbektisi, 626 bazar jáne 142 myńnan astam bólshek saýda nysany jumys istep tur.

2025 jyldyń birinshi jartyjyldyǵynyń qorytyndysy boıynsha saýdanyń naqty kólem ındeksi (NKI) josparlanǵan 8 paıyzdyń ornyna 8,4 paıyzǵa jetti. Saýda kólemi nomınaldy mánde 31,4 trln teńgeni qurady. Onyń ishinde kóterme saýdanyń NKI 109,2 paıyz nemese 21,2 trln teńge, bólshek saýdanyń NKI 106,6 paıyz nemese 10,1 trln teńge boldy. Bul kórsetkishter ótken jyldyń sáıkes kezeńimen salystyrǵanda joǵary, - delingen aqparatta.

Mınıstrlik shıkizattyq emes eksportty damytýdy basty basymdyqtardyń biri retinde atap ótti. 2025 jyldyń qańtar–sáýir aılarynda óńdeý ónerkásibi sektoryndaǵy taýar aınalymy 25 mlrd AQSh dollaryn, onyń ishinde eksport kólemi 7,8 mlrd dollardy qurady. Osy kezeńde kúnbaǵys maıynyń eksporty 69,5 paıyzǵa, janýarlarǵa arnalǵan azyq 2,5 esege, óńdelmegen jáne jartylaı óńdelgen altyn eksporty 52,7 paıyzǵa artty. Qazaqstandyq ónimderdiń negizgi eksport naryqtary – Reseı, Qytaı, Ózbekstan, Túrkııa, Qyrǵyzstan, Tájikstan, AQSh, Nıderland, Frantsııa jáne Japonııa.

- Saýda-ekonomıkalyq mıssııalar Iran (Tegeran), Vengrııa (Býdapesht), Qytaı (Sıan, Chýntsın) jáne Aýǵanstanda (Kabýl) uıymdastyryldy. Mıssııalarǵa 100-den astam qazaqstandyq eksporttaýshy qatysyp, azyq-túlik, agroónerkásip, metallýrgııa, hımııa, qurylys, medıtsına jáne logıstıka salalaryndaǵy ónimderin usyndy. Nátıjesinde jalpy somasy 333 mln AQSh dollary jáne 15 mln eýro bolatyn kommertsııalyq kelisimderge qol qoıyldy, - dep jazdy vedomstvodan.

Mınıstrlik eksporttyq akseleratsııa baǵdarlamasyn sátti iske asyrýda. Búginde 120 kompanııa eksporttyq qyzmetin jedel damytý ústinde. Olarǵa keńes berý, súıemeldeý jáne shyǵyndardy óteý túrinde keshendi qoldaý kórsetilýde. Sondaı-aq, otandyq kásipkerlerdiń halyqaralyq kórmelerge, sonyń ishinde Shanhaıdaǵy ımporttyq kórmege qatysýy uıymdastyrylýda.

Eksportty qoldaýdyń qoldanystaǵy sharalary da úzdiksiz jetildirilip keledi. Bul – jańa eksportqa baǵdarlanǵan kásiporyndardy damytýǵa jáne olardyń halyqaralyq naryqtarda básekege qabiletti bolýyna jol ashady.

- Tutynýshylardyń quqyqtaryn qorǵaý salasynda da júıeli jumys júrgizilýde. 2025 jyldyń alǵashqy alty aıynda komıtet pen onyń aýmaqtyq bólimshelerine 27 889 ótinish tústi. Sonyń nátıjesinde tutynýshylarǵa 881,4 mln teńge qaıtaryldy, - delingen derekte.

Aıta keteıik, Saýda mınıstrligi jalǵan aqparat taratatyn alaıaqtardan saq bolýǵa shaqyrdy.