Saýda ortalyǵynyń 3-qabatynan qulaǵan bala úıine qashan shyǵatyny belgili boldy
ALMATY. QazAqparat - «Mart» oıyn-saýyq saýda ortalyǵynda 3 qabattan qulaǵan 2 jasar Nurǵısaǵa jasalǵan ekinshi otadan keıin, onyń jaǵdaıy ortasha. Balanyń qazirgi jaǵdaıy týraly QazAqparat tilshisine Almaty dárigerleri aıtyp berdi.
Almaty qalasyndaǵy Balalarǵa jedel járdem kórsetý ortalyǵynyń Bas dárigeri Abaı Zikirııauly Qusaıynov bala kelesi aptada úıine shyǵarylýy múmkin ekenin aıtty.
«Balanyń qazirgi jaǵdaıy ortasha. Kelesi aptada bári durys bolsa, úıine jiberemiz. Dál qazir naqty aıta almaımyn, sebebi aldaǵy jumada balany taǵy da tekseredi. Aıaǵyna jasalǵan otadan keıin tikken jerlerin qaraıdy. Balanyń mıyna qan quıylǵandyqtan basyna birinshi ota jasalǵan bolatyn», - dedi ortalyqtyń bas dárigeri.
Abaı Zikirııaulynyń aıtýynsha, Nurǵısa úıine jiberilgennen keıin de dárigerlerdiń baqylaýynda bolady.
«Úıine jiberilgennen keıin, shamamen 1-2 aıdan keıin, óz aıaǵymen júrgennen soń taǵy da tekserip, bas súıeginiń jaraqatyna plastıka jasalady, tórt aıdan keıin aıaǵyndaǵy temir alynady. Jalpy qazirgi jaǵdaıy jaman emes. Anasymen birge em alyp jatyr», - dedi Abaı Qusaıynov.
20 qazan kúni Almaty dárigerleri balaǵa ekinshi ota, ortańǵy jiligindegi synyqqa jasalǵanyn habarlaǵan bolatyn.
Eske sala keteıik, 12 qazan kúni 2 jasar bala «Mart» oıyn-saýyq saýda ortalyǵynyń 3 qabatynan qulap ketken bolatyn. Dárigerler balaǵa ashyq bas mı jaraqaty, ortańǵy jilik synyǵy, keýde, ish perdesiniń soǵylýy sekildi dıagnoz qoıǵan bolatyn. Oqıǵa Túrkisib aýdandyq ІІB qaıǵyly jaǵdaı retinde tirkeýge alynǵan.
