Saýda ortalyǵynda qulaǵan balanyń anasy: Kim balasyn 3-shi qabattan laqtyrady?
ALMATY. QazAqparat - «Mart» saýda oıyn-saýyq ortalyǵynda 12 qazan kúni 3-shi qabattan qulap ketken eki jasar balanyń anasy Aınur Bekbasarova bolǵan oqıǵany aıtyp berdi, dep habarlaıdy QazAqparat tilshisi.
«Sol kúni úlken qyzymyzdyń týǵan kúni bolatyn. Balalardy oınatyp, qaıtyp kele jatqanbyz. Eki aılyq kishi balamyz qol arbada bolǵan. Nurǵısa (qulaǵan bala- red) ákesiniń qolynda bolǵan. Túsip kele jatqanda arbanyń dóńgelegi eskolatorǵa tirelip qaldy. Ákesi maǵan kómektesem dep, arbany julqyp qalǵanda qolyndaǵy Nurǵısa úshinshi qabattan qulap tústi. Eshkimge kinámiz joq. Jazmysh dep esepteımiz. Tehnıka jumys istep turdy. Kim balasyn 3-shi qabattan laqtyrady? Eshkimdi kinálamaımyz», - dedi Aınur Bekbasarova.
Jýrnalısterdiń suraǵyna jaýap bergen balanyń anasy kópbalaly otbasy ekenin aıtty.
«Bizdiń 4 balamyz bar. Bul úshinshi balamyz. Aty - Nurǵısa Joldybaı. Endi basyna jasaıtyn ekinshi ota bar. Soǵan daıyndalamyz. Barlyq ota, dáriler tegin. Búgin balamyzdy úıge apara jatqanymyzǵa qýanyshtymyz. Óte aýyr halde keldi. Aq halatty abzal jandarǵa alǵysym sheksiz. Áli de aıaǵynan turyp ketkenshe osy aýrýhananyń baqylaýynda bolamyz», - dep balanyń anasy alǵys bildirdi.
Aıta keteıik, 12 qazan kúni «Mart» saýda oıyn-saýyq ortalyǵynda 3-qabattan qulaǵan 2 jasar Nurǵısa úıine shyǵaryldy. Balalarǵa jedel medıtsınalyq kómek kórsetý ortalyǵy bas dárigeriniń orynbasary Dinmuhammed Rýzýddınov balanyń jaǵdaıy qanaǵattanarlyq ekenin aıtty.
«Jarty jyl balanyń jaǵdaıyn baqylaımyz jaqsy bolsa, basyna plastıkalyq ota jasaımyz. Basyna qan quıylǵandyqtan, birinshi otany basyna jasadyq. Bas súıeginiń detaldary saqtalyp tur. Jaǵdaıy jaqsy bolǵannan keıin, ekinshi ota jasaımyz. Ol bala bizge óte aýyr jaǵdaıda tústi. Qazirgi kezde jaǵdaıy qanaǵattarlyq. Buǵan deıin aıtaqynymyzdaı, osy ýaqyt aralyǵynda balaǵa eki ota jasaldy. Birinshi, bas súıegin, ekinshi, ortańǵy jiligine jasadyq. Qazir gıpspen úıine qaıtarylady. Sosyn, aıaǵyndaǵy gıpsin sheshemiz. Jaǵdaıy jaqsaryp, óz aıaǵymen júrgennen keıin, basyna úshinshi, plastıkalyq ota jasaımyz», - dedi D.Rýzýddınov.
Aıta keteıik, 12 qazan kúni 2 jasar bala «Mart» oıyn-saýyq saýda ortalyǵynyń 3-qabatynan qulap ketken bolatyn. Dárigerler balaǵa ashyq bas mı jaraqaty, ortańǵy jilik synyǵy, keýde, ish perdesiniń soǵylýy sekildi dıagnoz qoıǵan bolatyn. Oqıǵa Túrkisib aýdandyq ІІB-de qaıǵyly jaǵdaı retinde tirkeýge alynǵan.
