Saýda ortalyǵynda qulaǵan balaǵa qatysty dárigerler resmı alǵashqy aqparatty berdi
ALMATY. QazAqparat - Almatylyq dárigerler «Mart» oıyn-saýyq saýda ortalyǵynda 3 qabattan qulap ketken balanyń densaýlyǵyna qatysty resmı málimet berdi, dep habarlaıdy QazAqparat tilshisi.
Búgin Almaty qalasynda BAQ ókilderi úshin arnaıy baspasóz máslıhatyn ótkizgen Almaty qalasy Jedel medıtsınalyq kómek kórsetý ortalyǵy bas dárigeriniń orynbasary Dinmuhammed Rýzýddınov balanyń densaýlyǵyna qatysty naqty aqparatpen bólisti.
«12 qazan kúni keshki saǵat 17:50-de qaladaǵy saýda keshenderiniń birinen 2 jasar bala jetkizildi. Kýágerlerdiń jáne jedel medıtsınalyq qyzmet dárigerleriniń aıtýy boıynsha, bala 3-shi qabat baspaldaǵynan qulaǵan. Bizdiń boljaýymyzsha bala basymen qulaǵan. Balanyń jaǵdaıy óte aýyr. Ortalyqtyń neırohırýrgtary jáne basqa da sala boıynsha dárigerleri qarap, balaǵa qosarlanǵan jaraqat, ashyq bas mı jaraqaty, ortańǵy jilik synyǵy, keýde, ish perdesiniń soǵylýy sekildi dıagnoz qoıdy. Balaǵa túnde ota jasaldy. Bas mı jaraqaty kúrdeli bolǵandyqtan, ota jasaldy. Bala jansaqtaý bóliminde jatyr. Jaǵdaıy óte aýyr. Áli esin jıǵan joq. Qandaı em kerek sonyń bárin qabyldap jatyr. Durys bolady, jazylyp ketedi degen senimimiz bar», - dedi D.Rýzýddınov.
Bas dárigerdiń orynbasary balanyń densaýlyǵyna qatysty ázir boljam jasaı almaıtynyn, qajetti kómek kórsetilgenin aıtty.
«Bala ázir esin jıǵan joq. Boljam jasaı almaımyz. Barlyq kómek kórsetildi», - dedi ol.
Aıta keteıik, 12 qazan kúni Almaty qalasyndaǵy «Mart» saýda oıyn-saýyq ortalyǵynda eskalatormen ketip bara jatqan anasynyń qolynan qulap ketken. Oqıǵa Túrkisib aýdandyq ІІB qaıǵyly jaǵdaı retinde tirkeýge alynyp, polıtsııa tarapynan keshendi tekseris júrgizilip jatyr.
