Saýda ortalyǵynda qulaǵan 2 jasar balanyń jaǵdaıy áli de aýyr
ALMATY. QazAqparat - Almaty dárigerleri «MART» saýda oıyn-saýyq ortalyǵynda 3 qabattan qulaǵan baǵala qatysty jańa aqparat berdi, dep habarlaıdy QazAqparat tilshisi.
Dárigerlerdiń aıtýynsha, balanyń jaǵdaıy tómendemegen. Alaıda, onyń jaǵdaıy áli de óte aýyr.
«Balanyń jaǵdaıy óte aýyr, dárigerler baqylaýyna alynǵan ýaqyttan beri tómendegen joq. Bala jedel kómek kórsetý ortalyǵynyń jansaqtaý bóliminde jatyr», - delingen Almaty qalasy Densaýlyq saqtaý basqarmasynyń baspasóz qyzmeti taratqan aqparatta.
Aıta keteıik, 12 qazan kúni Almaty qalasyndaǵy «Mart» saýda oıyn-saýyq ortalyǵynda 2 jasar ul bala eskalatormen túsip bara jatqan anasynyń qolynan qulap ketken boldatyn. Oqıǵa Túrkisib aýdandyq ІІB qaıǵyly jaǵdaı retinde tirkeýge alynyp, polıtsııa tarapynan keshendi tekseris júrgizilip jatyr.
Balanyń densaýlyǵyna qatysty Almaty dárigerleri buǵan deıin de málimet bergen .
Almaty qalasy Balalarǵa jedel medıtsınalyq kómek kórsetý ortalyǵy bas dárigeriniń orynbasary Dinmuhammed Rýzýddınov balanyń densaýlyǵyna óte nashar ekenin aıtqan.
«12 qazan kúni keshki saǵat 17:50-de qaladaǵy saýda keshenderiniń birinen 2 jasar bala jetkizildi. Kýágerlerdiń jáne jedel medıtsınalyq qyzmet dárigerleriniń aıtýy boıynsha, bala 3-shi qabat baspaldaǵynan qulaǵan. Bizdiń boljaýymyzsha bala basymen qulaǵan. Balanyń jaǵdaıy óte aýyr. Ortalyqtyń neırohırýrgtary jáne basqa da sala boıynsha dárigerleri qarap, balaǵa qosarlanǵan jaraqat, ashyq bas mı jaraqaty, ortańǵy jilik synyǵy, keýde, ish perdesiniń soǵylýy sekildi dıagnoz qoıdy. Balaǵa túnde ota jasaldy. Bas mı jaraqaty kúrdeli bolǵandyqtan, ota jasaldy. Bala jansaqtaý bóliminde jatyr. Jaǵdaıy óte aýyr. Áli esin jıǵan joq. Qandaı em kerek sonyń bárin qabyldap jatyr. Durys bolady, jazylyp ketedi degen senimimiz bar», - degen bolatyn D.Rýzýddınov.
