Saýda ortalyǵynda 4 jasar qyzdy teýip qulatqan: kúdikti retinde Túrkııa azamaty ustaldy

ASTANA. QazAqparat - Almaty oblysynyń Qarasaı aýdanynda saýda ortalyǵynda 4 jasar qyz balany er adam teýip ushyrǵan. Osy oqıǵa boıynsha polıtsııaǵa búldirshinniń anasy aryz túsirip, kúdikti retinde 25 jastaǵy Túrkııa azamaty ustaldy, dep habarlaıdy QazAqparat.

Almaty oblysy PD basshysy Baýyrjan Alenov Feısbýktegi paraqshasynda jurttyń narazylyǵyn týdyrǵan oqıǵaǵa qatysty tolyq málimet berdi.

«Aǵymdaǵy jyldyń 23 shildesinde Qarasaı aýdanynyń Polıtsııa bólimine saýda, oıyn-saýyq ortalyǵynda onyń 2019 jylǵy qyzyna dene jaraqatyn keltirgen belgisiz adamǵa qatysty shara qabyldaý týraly 1996 jylǵy K. esimdi azamatsha aryzdandy.

Derek QR QK 293-babynyń 1-bóligi (buzaqylyq) boıynsha aýdandyq polıtsııada tirkeldi.

Jedel-izdestirý is-sharasy barysynda tártip saqshylary 1998 jylǵy Túrkııa Respýblıkasynyń azamatyn anyqtap, polıtsııaǵa jetkizdi. Kúdikti jaýap alý barysynda oqıǵany baıandap, óz kinásin tolyq moıyndady» delingen habarlamada.

Qazirgi ýaqytta ustalǵan adam zańnamada belgilengen tártippen ÝUI-ǵa qamaqqa alyndy. Saraptama taǵaıyndalyp, barlyq qajetti tergeý áreketteri júrgizilýde.

QR QPK-niń 201-babyna saı, ózge aqparat jarııalanbaıdy.