Saýda ortalyqtarynda órtten zardap shekkenderge shyǵyn óteledi
ASTANA. KAZINFORM — Kópshilik jınalatyn oryndar ıeleriniń jaýapkershiligin mindetti saqtandyrý engizilmek. Bul týraly Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva aıtty.
— 2025 jyly kópshilik jınalatyn oryndar ıeleriniń jaýapkershiligin mindetti saqtandyrýdy engizý josparlanyp otyr. Aýdany 2 000 sharshy metrden asatyn saýda ortalyqtary men iri kópshilik jınalatyn oryndardaǵy órtten zardap shekkenderge shyǵyn óteledi. Zań jobasy Parlament qaraýynda, — dedi Marııa Hadjıeva Ortalyq kommýnıkatsııalar qyzmetindegi brıfıngte.
Agenttik tóraǵasynyń orynbasary 2024 jyldyń qazan aıynan bastap medıtsına qyzmetkerleriniń kásibı jaýapkershiligin mindetti saqtandyrý engizilgenin atap ótti. Saqtandyrý medıtsına qyzmetkerlerin de, patsıentterdi de qorǵaýdy qamtamasyz etedi.
— Ol dárigerlerdiń kásibı qyzmetindegi qatelikter nemese kemshilikter saldarynan týyndaýy múmkin yqtımal shyǵyndardy jabýǵa múmkindik beredi. Buǵan patsıenttiń densaýlyǵyna zııan keltirgeni úshin ótemaqy, sondaı-aq sot isteri bolǵan jaǵdaıda sot shyǵyndaryn jabý kiredi, — dedi agenttik ókili.
Onyń aıtýynsha, atalǵan saqtandyrý túrin quramyna 14 saqtandyrý uıymy kiretin biryńǵaı saqtandyrý pýly júzege asyrady.
— Pýl iske qosylǵannan beri 1 620 shart jasalyp, 186 myń medıtsına qyzmetkeriniń jaýapkershiligi saqtandyryldy. Saqtandyrý syılyqaqylarynyń jalpy somasy 979 mln teńge boldy. Biryńǵaı saqtandyrý pýlynyń jarty jyldyq jumysy ishinde 35 mln teńge somasynda saqtandyrý tólemderi júzege asyryldy, — dedi Marııa Hadjıeva.
Aıta keteıik, 2024 jyly saqtandyrý uıymdarynyń jıyntyq aktıvteri 3,2 trln teńgege jetti. Sondaı-aq elimizde ıpotekalyq nesıelerdi saqtandyrýdyń standarttalǵan sharttary engizilmek.