Saýda nysandarynyń 30% aýmaǵyna otandyq taýarlardy qoıý mindetteldi
Onyń sózinshe, barlyq óńirde pııaz, sábiz, kartop, kúrish, un aıtarlyqtaı qymbattaǵan. Baǵanyń ósý sebepteri - rettelmegen ónidiris, tıimsiz deldaldar sanynyń kóp bolýy, saqtaý sharttarynyń oryndalmaýy, tutynýshyǵa deıin kepildengen jetkizý arnalarynyń joqtyǵy bolyp otyr.
«Baǵany turaqtandyrý sharalaryna kelsek, bıyl 16 tamyzda ishki saýda erejesindegi ózgerister kúshine endi. Oǵan sáıkes, otandyq óndirýshilerge barlyq saýda nysandarynda óz taýarlaryn ornalastyrýǵa múmkindik beriledi. Ol úshin ishki saýda sýbektileri sóreleriniń keminde 30% otandyq azyq-túlik taýarlaryna arnaý kerek. Bul rette halyqqa yńǵaıly bolý úshin otandyq taýarlar buryshy «Qazaqstanda jasalǵan» arnaıy belgisimen belgilenedi», - dep túsindirdi Baqyt Sultanov.
Baǵalardy turaqtandyrýdyń taǵy bir sharasy – áleýmettik mańyzy bar azyq-túlik taýarlaryna saýda ústemesin 15%-dan asyrmaý.
«Odan bólek, saýda jelileri áleýmettik mańyzy bar azyq-túlik taýarlaryn jetkizýshilerden syıaqy (retro-bonýs) ala almaıdy, al qalǵan azyq-túlik taýarlary boıynsha 5%-dan aspaıtyn mólsherde belgileıdi. Osyǵan baılanysty, bıznes sýbektilerine atalǵan normalardy oryndaý boıynsha túsindirý jumystaryn júrgizý kerek», - dedi Baqyt Sultanov.
Sonymen birge, qazirgi ýaqytta mınıstrlik Tutynýshylardyń quqyqtaryn qorǵaý týraly zań jobasyn ázirleýde. Zańda joǵaryda atalǵan normalardy oryndaý boıynsha ákimdikter men tutynýshylardyń quqyqtaryn qorǵaý departamentteriniń quzireti, ishki saýda sýbektileriniń jaýapkershiligi kózdeletin bolady.
