Saýda núktelerinde balalardyń densaýlyǵyna qaýipti oıynshyqtar anyqtaldy
Vedomstvo aqparatyna sáıkes, Soltústik Qazaqstan oblysynyń aýmaǵyndaǵy saýda núktelerinen satyp alynǵan «Feıa park» qýyrshaǵy, «My Little Horse» Fantastic toys oıynshyǵy, «LOL superise Castle park» qýyrshaǵy quramyndaǵy fenol men metıl spırtiniń ruqsat etilgen mólsheri eki ese, tipti odan da joǵary mólsherde bolǵan. Sonymen qatar, oıynshytardyń tańbalanýynda sáıkessizdikter bar. Munan bólek, Shyǵys Qazaqstan oblysynyń Aıagóz, Zyrıan, Rıdder qalalarynda, Petropavlda, Tarazda, Qostanaıda, Taldyqorǵanda saýdalanǵan balalar taýarlarynyń arnaıy tańbalary joq. Qytaıda shyǵarylǵan «Sofia the first» qýyrshaǵy, «Robocar Poli», «Hermit crab» oıynshyqtary, «Mını tobot» avtomobıl transformeri, Barbı qýyrshaǵy, ponı, bılıard, avtomobıl transformerleri, tikushaq, balalar syldyrmaǵy, mashınalar, «LOL» qýyrshaǵy syndy oıynshyqtar múldem tańbalanbaǵan.
«Komıtet azamattardan balalar oıynshyq satyp alý barysynda taýardyń tańbalanýyna jiti nazar aýdarýdy tabandy túrde ótinedi. Sebebi tutynýshylar bilýi tıis shyǵarýshy jáne materıal quramy, ónim neden jasalǵany, jas shekteýi týraly aqparattar oramasynda kórsetiledi. Satýshylardan taýardyń qaýipsizdigin dáleldeıtin sáıkestik sertıfıkatyn suraýǵa keńes beremiz. Sebebi 2018 jyldyń tamyzynan Qazaqstan aýmaǵyna sáıkestigin baǵalaý týraly qujaty joq oıynshyqtardy ákelýge tyıym salynǵan», - dep atap ótedi komıtetten.
Sonymen qatar, vedomstvo joǵaryda atalǵan qaýipti oıynshyqtardy saýda núktelerinen alyp tastaý, satýshylarǵa ákimshilik sıpattaǵy sharalar qabyldaý jumystary júrgizilip jatqandyǵyn atap ótken.