Saýda mınıstrligi ST-KZ sertıfıkattaryn berýge tólemaqyny alyp tastaýdy usyndy

ASTANA. QazAqparat - Saýda jáne ıntegratsııa mınıstrligi taýarlardyń shyǵarylǵan elin aıqyndaý jónindegi erejege ózgerister ázirledi, dep habarlaıdy QazAqparat QR Saýda jáne ıntegratsııa mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, atalǵan erejeler otandyq taýar óndirýshilerdiń satyp alýǵa qatysýyna múmkindik beretin ST-KZ sertıfıkatyn alý rásimderi men talaptaryn retteıdi.

Buıryqtyń tıisti jobasy qoǵamdyq talqylaý úshin «Ashyq NQA» portalynda ornalastyrylǵan.

Usynylatyn negizgi ózgerister:

Sertıfıkattar óteýsiz negizde beriletini tikeleı bekitilsin (qazirgi ýaqytta sertıfıkat bergeni úshin «Atameken» UKP Óńirlik kásipkerler palatalary jalpy jaǵdaıda 4 AEK mólsherinde aqy alady);

TMD elderiniń shıkizaty men materıaldary endi qazaqstandyqqa teńestirilmeıdi («úshinshi elderdiń taýarlary» termıni «sheteldik taýarlar» termınimen aýystyrylady. Qazirgi ýaqytta TMD elderinen keletin taýarlar sheteldik bolyp sanalmaıdy, tıisinshe TMD elderinde óndirilgen materıaldar men jıyntyqtaýyshtar olardy taýarlar óndirisinde paıdalaný kezinde is júzinde qazaqstandyqtarǵa teńestiriledi, ıaǵnı ózgerister tehnologııalyq operatsııalardy oryndaý jónindegi talapty odan ári aınalyp ótýge múmkindik bermeıdi);

ST-KZ berý aldynda taýar óndirisin mindetti foto jáne beınetirkeý boıynsha talap engiziledi;

Sertıfıkattardyń kúshin joıý ýákiletti organnyń sheshiminen keıin ǵana júzege asyrylatyn bolady (qazirgi ýaqytta sertıfıkattar ótinish berýshiniń bastamasy boıynsha joıylady, bul memlekettik baqylaý sharalaryn ýaqtyly qabyldaýǵa jáne zańsyz bergeni úshin jaýapqa tartýǵa múmkindik bermeıdi);

Taýarlar qaýipsizdiginiń mindetti talaptarynyń saqtalýyn qamtamasyz etetin sáıkestikti baǵalaý týraly qujattardy (sertıfıkattardy nemese deklaratsııalardy) jáne basqa da usynystardy usyný týraly talap engiziledi.

Qoǵamdyq talqylaý osy jyldyń 28 tamyzyna deıin jalǵasady.