Saýda mınıstrligi azyq-túlik ónimderine baǵany qadaǵalaýǵa alady
«Memleket basshysynyń Qazaqstan halqyna Joldaýynda Saýda mınıstrligine berilgen tapsyrmalar aıasynda atqarylatyn jumystarǵa toqtalsaq, birinshiden, Ulttyq taýar ótkizý júıesiniń negizgi mindeti óndirýshiden rıteılge deıin tolyq tsıkldi ınfraqurylymnyń tutas júıesin qurý bolyp otyr. Taýar óndirýshiler men jeke qosalqy sharýashylyqtardyń Kóterme saýda ortalyqtary júıesine erkin jáne básekeli qol jetkizýin qamtamasyz etý maqsatynda jeke ári memlekettik áriptester arasyndaǵy jasalǵan memlekettik -jekeshelik áriptestik sharty aıasynda tıisti normalar kózdeletin bolady. Bul aýyl sharýashylyǵy ónimderin ótkizý naryǵyn keńeıtýge múmkindik beredi jáne óndirýshini tutynýshyǵa jaqyndatatyn jeke ekonomıkalyq klasterdi qurady», - dedi Erjan Qazanbaev.
Óz kezeginde, erkin básekelestik pen ónimdi saqtaý jáne bólý ınfraqurylymy tarıfteriniń boljamdy deńgeıi bizdiń azamattarymyz úshin azyq-túliktiń túpkilikti baǵasyna oń áserin tıgizedi.
«Ekinshi tapsyrma – ol óndirýshiden tutynýshyǵa deıingi tizbek boıynsha tamaq ónimderiniń baǵasyn biryńǵaı baqylaý jónindegi negizgi jaýapty memlekettik organdy aıqyndaý jáne múddeli memlekettik organdardyń ózara is-qımyl reglamentin ázirleý. Osy tarmaqty iske asyrý úshin mınıstrlik Ulttyq ekonomıka mınıstrligi jáne basqa da múddeli organdarmen birlesip, bir aılyq merzimde Saýda jáne ıntegratsııa mınıstrligine óndirýshiden tutynýshyǵa deıingi tizbek boıynsha azyq-túlik taýarlaryna baǵa belgileýdi úılestirý jáne bólý jónindegi ýákiletti organnyń fýnktsııalaryn berý usynystaryn engizedi», - dedi vıtse-mınıstr.
Sonymen qatar, bir aı merziminde salalyq memlekettik organdar men uıymdar arasyndaǵy ózara is-qımyldyń tıisti reglamenti ázirlenetin bolady.
«Bizdiń maqsatymyz – azyq-túlik taýarlarynyń aǵyndary men baǵalaryn monıtorıngteý men boljaýdyń durys jáne tıimdi júıesin qurý. Bul memleketke naryq konektýrasy men baǵa ózgerýine ýaqtyly jáne jedel den qoıýǵa múmkindik beredi», - dedi ol.
