Saýda mınıstrliginiń ókili eldegi bazarlardy nege teksere almaı otyrǵandaryn aıtty
ASTANA. KAZINFORM – Saýda jáne ıntegratsııa mınıstrligi Saýda komıtetiniń tóraǵasy Aıdar Ábildabekov eldegi bazarlardy nege teksere almaı otyrǵandaryn aıtty.
Mınıstrlik janyndaǵy qoǵamdyq keńestiń otyrysynda keńes múshesi, «Bastama» ınstıtýtynyń prezıdenti Temirlan Jaqypbekov bazarlardy órkenıetti keıipke keltirip, jańǵyrtý jumystary tym uzaqqa sozylyp ketkenin aıtyp, merzim nege 2025 jylǵa deıin uzartylǵanyn surady.
Saýda komıtetiniń tóraǵasy Aıdar Ábildabekov bazarlardy tártipke keltirý áleýmettik astary bar másele ekenin aıtady.
«Bazarlarǵa ákimshilik shara qoldaný máselesine kelsek, biz Altyn Orda» bazaryn ǵana tekserdik. Ol bazarǵa saýda salasy boıynsha ákimshilik 2 aıyppul salyndy. Bul birinshi tekserý boldy. Buǵan deıin jergilikti atqarýshy organdardyń quzyreti bolǵan kezde bazarlardy tekserýmen aınalyspaǵan. Eger búkil bazardy osylaı tekserip shyqsaq, ne aıyppul salýǵa, ne jabýǵa májbúr bolamyz. Óıtkeni 2023 jyldyń 1 qańtaryna deıin búkil bazarlar jańǵyrtý júrgizý kerek bolǵan. Biraq júrgizgen joq. Ol bazarlarda ondaǵan myń adam jumys isteıtinin eskersek, bazarlardy jaýyp tastaı almaımyz. Árıne, bul jergilikti atqarýshy organdardyń quzyretindegi sharýa. Olar bazardy japsyn deıik, ári qaraı ne bolady? Myńdaǵan adam shyǵady, jumyssyz qalady. Bul óte áleýmettik másele. Sondyqtan jańǵyrtý máselesin 2025 jylǵa deıin uzartý usynylǵan bolatyn», - dedi ol.
Aıdar Ábildabekov bazarlardy tártipke keltirý máselesi 2015 jyldan beri sheshimin tappaı kele jatqanyn da atap ótti.
«Eń birinshi ret bul merzimdi 2015 jyly, odan keıin 2018 jyly, 2020 jyly, úsh ret uzartqan. Ol kezde Ulttyq ekonomıka mınıstrligi ne istegenin bilmeımin. Saýda mınıstrligi 2019 jyly qurylsa, bizdiń komıtet 2022 jyly quryldy. Sol qurylǵannan kúnnen bastap bazar qyzmetin tártipke keltirýge talpynyp jatyrmyz», - dedi komıtet basshysy
