Jetisý oblysynda jumyrtqa men sary maıdy 20-50 paıyz ústememen satqandar jazalandy

ASTANA. KAZINFORM - Jetisý oblysynda Saýda jáne tutynýshylardyń quqyqyǵyn qorǵaý departamentiniń aralasýynan keıin áleýmettik mańyzy bar azyq-túlik taýarlarynyń, onyń ishinde jumyrtqanyń baǵasy arzandady.

QR Saýda jáne ıntegratsııa mınıstrligi baspasóz qyzmetiniń habarlaýynsha, óńirde Saýda qyzmeti salasyndaǵy zańnamanyń saqtalýyn jáne baǵa retteý talaptarynyń oryndalýyn baqylaý jumystary júıeli júrgizilip júr. Kezekti tekserý barysynda jekelegen kásipkerlerdiń belgilengen normalardy saqtamaı otyrǵany anyqtaldy.

Monıtorıng nátıjesinde saýda kompanııalarynyń biri taýyq jumyrtqasyn óndirýshiden bir danasyn 50 teńgeden satyp alyp, ony jıyrmadan astam fırmalyq dúkeninde 60–75 teńge aralyǵynda satqan. Saýda ústemesi 20–50%-ǵa deıin jetip, ruqsat etilgen shekten aıtarlyqtaı asqan. Ákimshilik yqpal etý sharalary qoldanylǵannan keıin jumyrtqa baǵasy tómendetilip, zań talaptaryna sáıkestendirildi.

Zańbuzýshylyqtar ózge de áleýmettik mańyzy bar taýarlardy satý kezinde anyqtaldy. Jospardan tys tekserý barysynda bir JShS sary maıdy basqa seriktestikke jetkizip, keıin ol ónimdi jeti saýda jelisi men «úı janyndaǵy» dúkender arqyly 40–61% saýda ústemesimensatqan. Bul kórsetkishter de belgilengen shekten edáýir joǵary bolǵan.

«Saýda qyzmetin retteý týraly» Qazaqstan Respýblıkasynyń Zańyna sáıkes áleýmettik mańyzy bar azyq-túlik taýarlaryna saýda ústemesi óndirýshiniń satý baǵasynyń 15%-ynan aspaýy tıis. Atalǵan talapty buzǵany úshin QR ÁQBtK-niń 204-4-baby boıynsha jaýapkershilik kózdelgen, 2025 jyldan bastap aıyppul mólsheri kúsheıtildi.

-Tekserý qorytyndysy boıynsha sharýashylyq sýbektileri ákimshilik jaýapkershilikke tartylyp, aıyppul salyndy. Saýda ústemeleriniń saqtalýyn baqylaý – baǵa turaqtylyǵyn qamtamasyz etý jáne tutynýshylardyń quqyqtaryn qorǵaý baǵytyndaǵy basym mindetterdiń biri. Jyl basynan beri óńirde QR ÁQBtK-niń 204-4-baby boıynsha 17 materıal qaralyp, jalpy somasy 185 975 teńge aıyppul salyndy,-delingen habarlamada.

Departament kásipkerlerdi zańnama talaptaryn qatań saqtaýǵa shaqyrady. Áleýmettik mańyzy bar taýarlardyń baǵasyn negizsiz kóterý nemese taýarlarda baǵa belgileriniń bolmaýy faktileri anyqtalǵan jaǵdaıda azamattar E-Otinish platformasy arqyly resmı túrde departamentke júginýge quqyly.

Osyǵan deıin Almatyda azyq-túlik baǵasyn ustap turý úshin kásipkerlerge jeńildetilgen nesıe beriletini týraly jazdyq.